Delegados/as e traballadores/as de
Teleperformance continuaron este martes co calendario de mobilizacións
contra os despedimentos que está a executar a empresa de telemárketing,
logo de que Gas Natural decidise eliminar o servizo de atención
telefónica de Unión Fenosa Comercial que até agora se viña prestando
dende a plataforma da Coruña. Desta volta ás protestas trasladáronse
novamente até as portas da oficina principal de Gas Natural Fenosa.
Dende a Sección Sindical da CIG en Teleperformance lembraron
que até o momento xa recibiron a carta de despedimento 43
traballadores/as de servizos para Gas Natural Fenosa –que se farán
efectivos a finais de maio-; mais denunciaron que a empresa está a
despedir tamén a compañeiros/as destinados noutras campañas e servizos,
para así poder “facer oco” e recolocar a empregados/as de Unión Fenosa
Comercial.
Por iso, os delegados e delegadas da CIG en
Teleperformance calculan que serán uns 75 os/as traballadores/as
afectados/as pola decisión de Gas Natural de eliminar Unión Fenosa
Comercial. E iso sen garantías de que non se produzan novos axustes a
medio-longo prazo.
A estes despedimentos hai que engadir tamén os
afectados/as indirectos/as que son todos os demais traballadores e
traballadoras que, polo de agora manteñen o emprego porque lles cambian
de quendas, horarios, servizos, etc.
Ningún comentario:
Publicar un comentario