A xuíza decidiu a apertura de dilixencias penais contra os catro axentes despois da denuncia formulada polo cámara, que declarou está mañá nos Xulgados de Vigo, onde ía ser xulgado por suposta desobediencia e resistencia á autoridade nun xuízo rápido que finalmente non se celebrou, aínda que a Fiscalía mantén os cargos.
Así mesmo, o traballador foi examinado pola forense no edificio xudicial, que confirmou as lesións que figuraban no parte médico de urxencia.
Esta mesma tarde foi sometido a un novo exame no Hospital Xeral e detectóuselle unha escordadura de ombreiro e lesións nos pulsos que o incapacitan temporalmente para o exercicio da súa profesión, polo que tivo que solicitar a baixa médica.
Presenta tamén feridas e contusións en distintas partes do corpo. Previamente recollera a súa cámara nos Xulgados, onde puido comprobar que presenta desperfectos. A tarxeta de memoria foi aportada como proba polo propio afectado tras recoller a cámara, polo que lle solicitou á xuíza que incorporase unha copia das imaxes ás dilixencias.
Detido mentres desenvolvía o seu labor
O cámara foi detido na madrugada do 29-M mentres rexistraba imaxes dun piquete informativo na parte traseira do Alcampo de Coia, en Vigo, acusado de desobediencia e resistencia á autoridade, por supostamente terse negado a identificarse e ter intentado impedir a súa detención.
O afectado insistiu na súa declaración perante a xuíza que en ningún momento se negou a amosarlle a súa identificación aos axentes, “só que non me deron tempo porque comezaron e empuxarme bruscamente cara aos furgóns policiais”. Eu só lles dicía -explica- que tiveran coidado coa cámara, que a ían romper, e intentaba sostela cunha man mentres tiña a outra metida no peto para sacar a miña identificación.
O cámara é reducido entón con violencia e até catro axentes participan na colocación das esposas, proceso que se prolonga máis de 10 minutos ante a indignación do pequeno grupo de persoas que a esa hora formaba un piquete no que non se rexistraran incidentes. O detido limitábase a tomar imaxes e foi requerido polos axentes cando xa abandonaba o lugar e sen que antes se tivesen dirixido a el en ningunha ocasión.
Esta desmesurada actuación policial podería responder, segundo lle manifestou o traballador á xuíza, ao feito de que minutos antes rexistrara coa súa cámara como os axentes se dirixían ao integrantes do piquete con violencia e faltas de respecto a pesar de que non se produciron momentos de tensión. De feito, outras persoas que gravaban con teléfonos móbiles tamén foron identificadas polos policías e obrigadas a borrar as imaxes.
Ningún comentario:
Publicar un comentario