21/03/2012

Delegados/as da CIG ocupan entidades bancarias de todo o país para denunciar a súa responsabilidade na crise económica

A CIG realizou este martes ocupacións simbólicas nas oficinas de distintas entidades bancarias para rexeitar a reforma laboral, chamar á participación na folga xeral do vindeiro 29 de marzo e denunciar a responsabilidade do sector financeiro na xeración da crise. As ocupacións realizáronse nas sete cidades galegas, agás en Compostela, onde un forte dispositivo policial impediu aos delegados e delegadas da central sindical acceder á unha oficina do BBVA.

Con esta xornada de loita a CIG quere rexeitar as políticas económicas, sociais e laborais que tanto o goberno do PP en Madrid como na Xunta de Galiza están a pór en marcha. Unha batería de medidas dirixidas a recortar os dereitos laborais conquistados pola clase obreira nas últimas décadas e provocar unha perda xeneralizada do poder adquisitivo dos traballadores e traballadoras. Unhas medidas que, fronte ao que se pretende facer crer dende os poderes, resultan ineficaces para reactivar a economía real e xerar emprego.

Porén, mentres a maioría social padece as consecuencias máis graves dunha crise que non provocou, a oligarquía financeira e o gran capital continúan obtendo beneficios anuais de miles de millóns de euros.

(Máis información en www.galizacig.com)

Ningún comentario: