No mes de decembro a nosa comunidade encabeza a suba do paro con 2.251, mentres descende na media estatal
A CIG considera alarmante o incremento do paro en
Galiza no ano 2012, que medrou case que un 8% (7,96%), cun total de 20.553
persoas desempregadas máis que no ano 2011. Os datos do mes de decembro
tampouco son mellores. De feito, na media do estado descendeu o paro, porén situámonos
como a comunidade na que máis subiu respecto do mes de novembro, con 2.251
parados/as máis. Así as cousas, remata o ano cun total de 278.787 parados/as.
O desemprego acada
cotas que a CIG considera insostíbeis e que son aínda máis graves tendo en
conta que nos orzamentos da Xunta para 2013 non se articulan medidas de apoio
aos sectores produtivos que permitan pensar nunha pronta recuperación económica
e, en consecuencia, que favorezan a creación de emprego. “Insístese na política
de recortes, o que vai afondar aínda máis a recesión económica e xerar máis
desemprego”, sinala o secretario confederal de Emprego Antonio López Rivera.
Ante
isto, a CIG demanda mudar, con urxencia, as políticas baseadas na austeridade
para frear a espiral de destrución de emprego que padecemos e que se recoñeza o
rotundo fracaso das reformas laborais. López Rivera alerta ademais sobre a
situación de exclusión social na que pasarán a estar moitas persoas se non se
remata coa política de recortes sociais. No canto diso, insiste na necesidade
de activar mecanismos que impidan que miles de persoas que xa están sen
ingresos teñan que depender da beneficencia.
O
sector onde máis medrou o paro foi no de Servizos, que rexistrou en 2012 un
total de 21.796 parados máis que o ano pasado. Porén, respecto do mes de
novembro, onde máis medrou foi no sector da Construción, cun incremento do
4,25%, fronte ao 0,58 na media estatal. Tamén Industria experimentou un
importante incremento, co 3,23% máis, fronte a media estatal, onde o incremento
foi do 0,52%. Fronte a isto, o sector Servizos tivo un lixeiro descendo do
paro, que se explica por mor do Nadal e que foi do 0,47%, fronte o 1,62 na
media estatal.
Tamén descendeu o
número de contratos respecto do mes de novembro en 6.879. Deste xeito, en
decembro, asináronse un total de 44.779 dos que o 91,8% foron temporais, o que
evidencia a elevadísima temporalidade existente na contratación.
Malia todo, estes
datos non chegan a reflectir a gravidade da situación laboral porque non ten en
conta o incremento exponencial da emigración neste último ano.
Ningún comentario:
Publicar un comentario