O persoal de Sykes inicia mobilizacións contra as intencións da empresa de despedir a 165 traballadoras/es

A Presidenta do Comité, Dina Lema, explicou que a representación do persoal xa se ten dirixido á Consellaría de Traballo e á Inspección de Traballo para “que non permitan esta masacre”. Sykes, alegando a perda do contrato da campaña “Negocios e Profesionais” de Telefónica-Movistar, pretende rescindir o contrato a 81 traballadores/as eventuais e despedir a outros 84 fixas/os a través da aplicación dun ERE extintivo.

Non obstante, Sykes aínda non acreditou a suposta perda de contrato e por iso, o Comité pediu ás administración que reclamen á dirección a acreditación documental correspondente. Ademais, solicitan da Xunta e da Inspección que cite á propia Telefónica-Movistar co obxecto de que aclare a que plataforma vai levar o contrato, xa que, segundo o estabelecido no artigo 18 do Convenio Colectivo, os traballadores e as traballadoras afectadas teñen dereito a seren subrogados na seguinte empresa que vaia operar a campaña.

(Máis información en www.galizacig.com)