Sección Sindical CIG BOSCH

5 anos de conxelación salarial en Telemárketing = 20% de perda de poder adquisitivo

2012-02-01T02:00:00.000-08:00

CCOO-UGT e as patronais CEOE e CEPYME, asinaron o 25 de xaneiro o II Acordo Interconfederal, que pacta o contido dos Convenios para os anos 2012, 2013 e 2014. Nese acordo establécense subas salariais por baixo da suba dos prezos e da vida, polo que estamos ante un novo recorte salarial que se suma ao que levamos en 2010 e 2011. Se se aplica este acordo, tal e como teñen aprobado, no Convenio Colectivo do sector de Telemárketing, o recorte salarial pode situarse no 20% dende 2009 ata 2014.

Ademais pactaron introducir nos Convenios medidas de “flexibilidade”, por riba do que pedían as empresas de Telemárketing no noso Convenio. Este é o froito da centralización da negociación colectiva, do modelo sindical de cúpulas que prescinde da participación dos traballadores e traballadoras: recortes e máis recortes.

Aumento da flexibilidade interna na empresa

Outro dos puntos destacados do acordo é que hai que aumentar a flexibilidade laboral, para o que dan máis poder de decisión ás empresas sobre cuestións esenciais, como son a distribución do tempo de traballo, a mobilidade funcional ou a flexibilidade en materia salarial.

En concreto, o acordo indica que:

· Os convenios colectivos deberán facilitar que a empresa poda distribuír irregularmente o 10% da xornada anual.
· Ademais, os convenios colectivos deberían posibilitar que a empresa dispoña de unha bolsa de cinco días (ou 40 horas) ao ano, que poderá alterar na distribución prevista no calendario anual.
· A mobilidade funcional dentro da empresa só debe ser limitada pola pertenza ao grupo profesional ou polas titulacións esixidas. Non se considerará a categoría profesional a efectos de mobilidade funcional.
· Estas porcentaxes poderanse modificar nos distintos ámbitos de negociación.
· Por se todo isto fose pouco, os convenios colectivos deberían contemplar medidas de maior flexibilidade cando a empresa necesite distribuír de xeito irregular máis xornada ou cando necesite maior mobilidade funcional.

O Acordo Interconfederal habilita non aplicar na empresa determinadas condicións de traballo pactadas nos convenios sectoriais.

Este punto, ao igual que os anteriores, supón asumir e ir máis alá do aprobado nas últimas reformas laborais. En concreto, establécense os criterios que deben seguir as empresas para non aplicar, de xeito temporal, cuestións coma o horario e distribución da xornada, réxime de traballo a quendas, sistema de remuneración ou as funcións a desempeñar polos traballadores e traballadoras.

A redución masiva de salarios reducirá o consumo e agravará a crise; a implantación da flexibilidade precarizará aínda máis as condicións laborais e incrementará os despedimentos. Din que é un acordo polo emprego, pero xerará máis paro, pobreza e precariedade. Simplemente as cúpulas do sindicalismo español venderon aos traballadores e traballadoras.

UGT e CCOO venderon á clase traballadora

2012-01-26T05:40:00.000-08:00

Levamos perdida unha paga en 2 anos sen Convenio

2012-01-26T03:27:00.000-08:00

As empresas de Telemárketing non sofren as consecuencias da crise, pero pretenden que asumamos as consecuencias dunha crise que nós non provocamos e que elas non padecen. Algunha das grandes empresas deste sector, que nos nega a suba salarial, publicou que no primeiro semestre do ano pasado os seus beneficios subiron un 25% (Atento).

A suba do custe da vida superou con creces o propio incremento do IPC, pero en todo caso, en relación a ese indicador utilizado ata o de agora na negociación colectiva, dende o 2009 acumulamos unha perda de case 1 paga.

Salario 2009 Salario +IPC Perda acumulada

Teleoperador/a 12,956,18 13.655,81 701 euros
Tel. Especialista 13.550,16 14.281,87 732 euros

O IPC do ano 2010 pechou no 3%, o do 2011 pechou no 2,4%, pero os nosos salarios están conxelados dende o 2009. Malia que non subiron os salarios, o anterior Goberno subiu o IVE e autorizou subas no gas, correos, ou a electricidade (10%) no 2011.

A partir de febreiro de 2012 xurdirá efecto a suba de impostos (IRPF e IBI) aprobada polo novo Goberno Central: cobramos menos salario e pagaremos máis impostos. O Goberno retirou tamén a axuda ao aluguer. (Nese mesmo Consello de Ministros aprobaron axudas aos bancos por 100.000 millóns de euros). E xa anuncian subas da electricidade, gas, hipotecas ou auga.

As nosas empresas escusaranse en que a negociación do Convenio está bloqueada, á espera da reforma laboral e da negociación colectiva que prepara o PP e que conta coa complicidade de CCOO-UGT, que a negocian coa CEOE. Unha reforma para rebaixar dereitos e salarios.

Fronte a esta situación de inxustiza social, o 12 de xaneiro a CIG concentrouse en toda Galiza contra estas medidas do Goberno. Non aceptamos que as empresas manteñan conxelados os nosos salarios dende o 2009, mentres soben os prezos da vida e os impostos. Non hai escusa que valga, queremos que suban os salarios XA!, e se non o fan haberá conflito nas empresas. Xa está ben de tomarnos o pelo.

Se traballamos, temos dereito a un salario digno que, cando menos, nos dea para vivir, e non aceptamos baixo ningún concepto ampliar as facilidades para despedir ao actual persoal. Xa hai desempregadas/os de abondo, e despedir é demasiado doado no noso sector.

Último recorte do PSOE sen que teñamos un Convenio que nos ampare

2011-11-25T04:28:00.001-08:00

O BOE do 18 de novembro publica o Real Decreto 1543/2011 polo que se regulan as prácticas “non laborais” nas empresas, o último agasallo do PSOE ás patronais. Con este decretazo, que pode facer estragos no noso sector, rexurde a figura do “aprendiz”.

As empresas poderán “contratar” aprendices, persoas entre os 18 e os 25 anos e incluso con experiencia no sector de ata 3 meses.

Non existirá relación laboral, non cobrarán salarios e a única compensación serán unhas “bolsas” polo 80% do IPREM mensual (indicador que este ano está en 532 euros). O Real Decreto non regula o tipo de encomendas ou outras condicións laborais que afectaran aos/ás aprendices.

Iso si, a “contratación” de aprendices pode dar lugar a subvencións para as empresas que compensen os gastos derivados das accións de titoría e avaliación.

Coa última medida do PSOE as empresas poderán poñer persoal a traballar por 426 euros ao mes, o que pode facer que teñan a tentación de desfacerse de persoal actual.

O Convenio Colectivo Estatal continua bloqueado pola patronal, sabedora de que as continuas reformas antisociais e laborais, antes do PSOE e no futuro do PP, fortalecerán o seu poder. Din que queren o despedimento exprés, e para iso propoñen un novo redactado do artigo 17 que é ilegal (quizás coñezan algúns dos cambios que porá en marcha o novo goberno). Ademais, levamos 23 meses cos salarios conxelados, nun sector que non está en crise.

Fronte aos continuos cambios normativos que están debilitando aos traballadores e traballadoras, debemos blindar as nosas condicións laborais coa negociación dun Convenio marco que poña cota a ofensiva política das patronais e dos seus gobernos monicreques. Para iso é preciso abandonar o sectarismo sindical e propoñer medidas conxuntas co suficiente calado para forzar á Patronal a negociar. É preciso blindar os nosos postos de traballo.

Nun momento de emerxencia social o traballo deslocalizado debe volver

2011-10-11T02:02:00.000-07:00

A patronal das empresas de telemárketing ACCE, fixo onte unha nova proposta que resulta totalmente inasumible e que pasamos a resumirvos:

Proposta ACCE

Vixencia: 3 anos (2010-2011-2012).

Suba salarial: Desvincular a suba dos salarios do incremento do custe da vida (IPC).

Ano	Suba Proposta	IPC	Perda Salarial
2010	0,00%	3,00%	-3,00%
2011	1,50%	3,1% a setembro	-1,60%
2012	1,50%	----	----

Despedimentos colectivos (artigo 17): Malia que a petición de CCOO e UGT a patronal quedou na reunión anterior en facer unha proposta para poder despedir tamén ao persoal indefinido a través deste artigo, é dicir sen garantías. ACCE viu á reunión coas mans baleiras.

Novamente quedaron en facer unha proposta por escrito que nos remitiran antes do día 10 de novembro, data na que se reunirá de novo a mesa negociadora (dentro dun mes o que demostra a falta de interese da patronal por chegar a un acordo).

Posición da CIG

A patronal está conseguindo marcar os tempos da negociación e os contidos, xa non se fala mais que daquelas cuestións nas que teñen interese as empresas: recortar salarios e facilitar aínda mais os despedimentos.

O telemárketing non está en crise, cada vez un maior número de empresas principais deciden subcontratar a través de contact center para abaratar custes o que xera novas campañas. Outra cuestión é que moitas rematan deslocalizadas fora do Estado nun momento no que o paro acada cotas de autentica emerxencia social. Esiximos ás empresas de telemárketing que deixen de levarse o traballo a América ou África, cando na Galiza hai 232.918 persoas no paro.

Si as empresas principais e as contratas de telemárketing teiman en manter deslocalizados mais de 25.000 postos de traballo, estaran demostrando que son inimigas da sociedade, eles saberan a que queren enfrontarse. A deslocalización é unha traizón a todos os pobos do Estado Español.

Alucinante: CCOO e UGT consenten en ampliar o artigo 17 ao persoal indefinido

2011-09-21T15:09:00.000-07:00

Despois de meses de bloqueo da negociación do Convenio Colectivo de Contact Center (Telemárketing), o día 20 de setembro asistimos a unha reunión que non podemos cualificar máis que como alucinante. Os sindicatos centralistas defendendo a inclusión das causas de despido no convenio, e a patronal dicindo que no 2010 xa subiron os salarios que levan conxelados dende o 2009. Como a reunión foi pola tarde só se explicaría esta situación se comeron xuntos (e abusaron do viño e dos “chupitos”).

As empresas teiman dende o inicio da negociación en ampliar o artigo 17 (que permite despedir ao persoal temporal sen garantías), para poder despedir tamén ao persoal indefinido e ese foi un dos escollos que alongou a negociación 21 meses. Ademais malia que levamos co salario conxelado dende o ano 2009, din que no ano 2010 xa subiron os salarios, e que hai que partir desa situación ¿?.

Pero se a posición da ACCE é alucinante, aínda o é máis a postura de CCOO/UGT, que esta vez estiveron representados por “profesionais do sindicalismo” (burócratas sindicais) alleos ao sector de Telemárketing.

Os burócratas pro-empresa dixeron que, dado que a lexislación establece os criterios para despedir ao persoal indefinido, a patronal só ten que propoñer un redactado para o artigo 17 que permita despedir a este persoal legalmente. Hai pouco, fixeron un chamamento á folga xeral contra a reforma laboral, e agora propoñen incluíla no convenio.

Para a CIG o problema non é poder despedir colectivamente sen garantías ao persoal indefinido, senón ampliar as garantías para o persoal temporal. Xa abonda de despedimentos inxustos.

Antes do verán, unha das empresas que forman parte da patronal ACCE, Unísono, presentou un ERE extintivo nun centro de traballo en Vigo. Despois da negociación o ERE transformouse en temporal e rotatorio, demostrando que hai alternativas factibles aos despedimentos incluso nos peores momentos.

A patronal recorre aos despedimentos caprichosamente, como demostra o caso de Unísono en Vigo. Tiran de despedimentos porque é o máis fácil, pero non é o máis xusto nin sempre é necesario.

O coaching e os teus dereitos

2011-09-21T15:07:00.000-07:00

Os coachings son unha ferramenta que serve para avaliar a calidade do noso traballo e, en teoría, para axudarnos a mellorar no noso trabalo diario. Pero tamén temos que ter en conta que e unha ferramenta que serve á empresa para medir a nosa produtividade laboral e polo tanto unha información que queda arquivada sempre nos nosos expedientes.

Polo tanto sempre que nos entreguen un coaching é moi importante ter en conta o seguinte:

Un coaching ter que ser entregado e realizado sempre polo teu responsable, (coordinador/a ou supervisor/a), ou por unha persoa do departamento de calidade ou formación.
Os coachings son persoais e privados e polo tanto teñen que ser entregados nun lugar axeitado ao efecto. Non é correcto revisar un coaching durante unha chamada nin no medio da plataforma ao carón dos teus compañeiros e compañeiras.
Revisa sempre a data de cando foi realizado o coaching e sempre indica por escrito a data na que te fan entrega do mesmo. Cando nos entregan un coaching de fai dous meses ou incluso anterior é bastante difícil facer memoria para poder recordar a chamada, incidencia ou caso en cuestión, e poder rebater os puntos valorados.
Lembra que hai un recadro reservado para as “observacións do traballador/a” e no que debes indicar todo co que non esteas conforme. Tes dereito a deixar constancia por escrito tamén as túas consideracións xa que o coaching é unha ferramenta para mellorar o traballo de todos e todas.
Cando vaias a asinar o coaching se non estás conforme co resultado, e unha vez feitas as alegacións oportunas no recadro de “observacións do traballador/a”, podes asinar como NON CONFORME.
Ao rematar o coaching teñen que facerte entrega dunha copia do definitivo onde aparezan tamén reflectidas as túas observacións e comentarios.

É importante ter todos estes puntos en conta á hora de recibir un coaching xa que reflexa, ademais da calidade do noso traballo, a nosa produtividade laboral algo que á empresa sempre vai a ter moi en conta.

Se tedes algunha dúbida máis con respecto aos coachings, ou calquera outra cuestión de dereitos laborais os delegados e delegadas da CIG estamos a vosa disposición para axudarvos ou se o preferides remitilas ao correo cigbosch@gmail.com

Inspección de traballo ratifica que a antigüidade é a do primeiro contrato

2011-07-27T15:35:00.000-07:00

Como xa sabedes a nosa empresa o mes pasado decidiu volver a realizar pases de persoal de ETT a empresa, continuando así o proceso que comezou tras as reivindicacións dos traballadores e traballadoras que transmitimos a través desta Sección Sindical.

A sorpresa foi que desta vez a empresa tiña un interese esaxerado en que os traballadores e traballadoras asinasen a baixa voluntaria na ETT previamente á sinatura do contrato con Bosch, polo que ao final se obrigaba a o persoal a asinar unha baixa “voluntaria”.

Ante esta nova actitude caciquil da empresa, dende esta Sección Sindical presentamos unha nova denuncia contra a empresa na Inspección de Traballo xa que entendíamos que, a intención da empresa coa sinatura desta baixa voluntaria é que o persoal non conserve a antigüidade que ten o traballador/a no posto de traballo e así non ter incluír a este persoal dentro dos procesos de conversión a indefinidos.

Como non podía ser doutro xeito, Inspección de Traballo deunos a razón e requiriulle á empresa que a data de antigüidade dos traballadores e traballadoras é a que corresponde á data do primeiro contrato, sexa por ETT ou a través de contratación directa de Bosch, incluso se hai asinada polo medio unha baixa voluntaria. Ademais o feito de asinar a baixa voluntaria non exclúe ao traballador/a do proceso de conversión do seu contrato en indefinido segundo estipula o Estatuto dos Traballadores.

Asemblea e manifestación nacional contra a reforma da negociación colectiva

2011-06-20T01:57:00.000-07:00


A CIG telemárketing de novo na rúa en demanda do Convenio

Unha vez escenificada a ruptura da negociación entre (CEOE-CCOO-UGT), o Goberno Central aprobou por Decreto a Reforma da negociación colectiva. Unha vez máis estamos ante decisións de recortes sociais que toman a crise como escusa pero que foron formuladas con antelación á mesma: a “flexiseguridade” foi plantexada pola UE no 2007. Un decretazo que empobrece os Convenios e lles resta eficacia fronte as decisións da empresa.

-Modifica a estrutura da negociación colectiva. Se ata o de agora os Convenios de Empresa non podían empeorar o establecido no Convenio Sectorial (que establecía as condicións laborais mínimas), coa reforma, a negociación na empresa poderá decidir en materias como salarios, horarios ou clasificación profesional, por baixo do Convenio Sectorial. Ademais, a nivel das grandes empresas persegue dar o monopolio da negociación a CCOO e UGT, poñendo trabas á participación do resto de sindicatos.

Tamén a reforma avanza cara a centralización dos convenios sectoriais. Restrínxese a participación dos traballadores/as implicados na toma de decisións, empobrecendo a negociación colectiva.

-Modifica o contido dos Convenios. Tal e como pactaron CEOE-CCOO-UGT previamente, os Convenios recollerán medidas en materia de “flexibilidade salarial” (facilidades de modificación ou recorte salarial unilateral, ou incluso pagos en especies); “flexibilidade horaria” (non confundir con que o persoal poda elixir horarios, será a empresa a que poda modificar a estrutura dos horarios); eliminar límites á mobilidade xeográfica ou eliminar as limitacións á mobilidade funcional.

-Modifica a vixencia. Se ata o de agora cando vencía un Convenio, mantiña a súa vixencia ata que se negociase un novo, agora o Goberno limitou a ultraactividade e estableceu unha arbitraxe.

Por todo isto a CIG saíu de novo a rúa. O pasado 16 de xuño a CIG celebrou unha asemblea nacional de delegados/as en Santiago e posteriormente unha manifestación. As delegadas e delegados da CIG no sector de Telemárketing saímos a rúa para protestar pola situación do noso convenio, e a intención das empresas de recortar salarios e dereitos laborais.

Comunicado xornada de loita

2011-06-20T01:52:00.001-07:00

Video xornada de loita en Vigo polo Convenio

2011-06-09T11:59:00.001-07:00

Fotos xornada de loita 8 de xuño

2011-06-08T04:44:00.000-07:00

8 de xuño xornada de loita polo Convenio.

2011-06-07T05:32:00.000-07:00

Preparando o material para a xornada de loita

Hoxe estivemos preparando o material para a xornada de loita de maña 8 de xuño, día en que se cumpriran 524 días co salario conxelado por mor do bloqueo do Convenio Colectivo Estatal. Imos para 18 meses sen Convenio.

Bosch é unha das empresas responsables do bloqueo, xa que forma parte da patronal ACCE, o mesmo que Unísono.

Son elas as que queren un convenio con conxelación salarial e con despedimento libre tanto para o persoal indefinido como para o persoal temporal.

A súa avariza non ten límite, malia o incremento do volume de negocio e do seu beneficio en tempos de crise teiman en recortar salarios e dereitos. A CIG daralle resposta maña 8 de xuño coa convocatoria dunha xornada de loita sectorial en Vigo, continuación da desenvolvida o pasado 1 de xuño na Coruña

Convenio estatal: negocio da patronal

2011-06-01T15:48:00.000-07:00

O 1 de xuño, cando se cumpre o ano e medio sen convenio, a CIG mobilizouse en varias plataformas de telemárketing na Coruña (Atento-Juan Florez, Sykes, Atento-A Grela, ou Eurocen), con concentracións dende as 10 da maña ata as 13:30.

O persoal propio das empresas principais (de telecomunicacións, bancos, do sector da enerxía, etc.) cobra de media 35.000 euros anuais, por facer traballos semellantes ou iguais ao noso. Pero malia que os nosos salarios son máis baixos, as Direccións das grandes empresas presionan para “rebaixar custes” e levamos 18 meses co salario conxelado.

Eses mesmos Directivos, executivos das empresas principais que subcontratan a través do telemárketing (como Telefónica, Santander, Iberdola, etc.), son os mellor pagados do Estado, con salarios que van do 1.000.000 de euros aos 10.000.000 millóns anuais.

Por poñer un exemplo o Presidente de Atento, a maior empresa de telemárketing e que ten o maior peso na patronal “ACCE”, Javier de Paz, asesor persoal de Zapatero, pode cobrar este ano preto dos 1.300.000 euros, tendo en conta os bonus e incentivos.

Malia todo isto a patronal di que só aceptará un acordo que manteña conxelados os salarios do persoal e que amplíe e abarate os despedimentos. Nos últimos 4 anos despediron a 2.000 persoas, nun sector que emprega a 8.000 persoas en Galiza.

O Convenio Estatal de Contact Center (chámanlle así en inglés porque pensan que queda moderno) é un gran negocio para as empresas de telemárketing e as empresas principais e un mal negocio para os traballadores e traballadoras.

Xornadas de loita por un Convenio Xusto

2011-05-23T05:11:00.000-07:00

A maior parte dos Convenios que deberían negociarse este ano, están bloqueados á espera das modificacións que nesta materia poidan impoñerse froito do diálogo social entre CCOO-UGT-CEOE para reformar a negociación colectiva.

Esta reforma modificará a estrutura e os contidos dos Convenios precarizando aínda máis o mundo laboral, polo que mentres non se resolva ese “diálogo social”, dificilmente se avanzará na negociación do noso Convenio. A nosa patronal, como todas, agarda para tirar novas vantaxes dese “diálogo”.

Así mesmo, o pasado mes de marzo, o Goberno Central aprobou o anteproxecto de lei de atención á clientela, que afectará de cheo a actividade do sector de telemárketing. Semella que a Patronal tamén quere agardar a coñecer o alcance da futura norma.

Outra cuestión é que, no caso concreto do Convenio de Contact Center, a negociación leva paralizada dende hai ano e medio, e a situación, que en ningún caso é responsabilidade dos traballadores/as, é inasumible.

Non hai reunións previstas para seguir negociando, polo que é preciso continuar coas mobilizacións, e a CIG ten convocadas dúas xornadas de loita sectoriais con mobilizacións nas maiores empresas de Galiza. Pero polo momento non convocaremos novos paros ou folgas polo Convenio, xa que non queremos facervos pagar aos traballadores/as as consecuencias do retraso nun “diálogo social” que por outra parte tamén será lesivo.

Xornada de loita día 1 de xuño de 2011 na cidade de A Coruña

Empresa	Horario	Enderezo
Atento	10:00 ás 10:30 horas	Rúa Juan Florez 80-82
Sykes/Atento	11:30 ás 12:00 horas	Rúa Galileo Galilei, 4 Edf WorkCenter Polígono A Grela
Eurocen	13:00 ás 13:30 horas	r/ Enrique Mariñas s/n (Edificio Proa).

Xornada de loita día 8 de xuño de 2011 na cidade de Vigo

Empresa	Horario	Enderezo
Bosch	10:00 ás 10:30 horas	Rúa María Berdiales, 20
Unísono	11:00 ás 11:30 horas	Gran Vía 110
Bosch	12:00 ás 12:30 horas	Avenida de Madrid, 183

Última xornada de paros no sector de telemárketing

2011-04-12T00:26:00.000-07:00

Lembrámosvos que mañá, mércores 13 de abril terá lugar a última xornada de paros, de unha hora de duración, convocados pola CIG para reclamar o noso dereito a negociar mellores condicións laborais no noso convenio, e para demostrarlle a patronal que non estamos dispostos a aceptar unha nova precarización dos nosos postos de traballo.

Por un convenio xusto, digno e galego concéntrate canda nós diante dos centros de traballo nos seguintes horarios:

DÍA	Quenda de NOITE	Quenda de MAÑÁ	Quenda de TARDE
13 abril	00:00 a 1:00	12:00 a 13:00	18:00 ás 19:00

Paros de 1 hora O 30 de marzo e 4 e 13 de abril

2011-03-24T16:12:00.000-07:00

O que está pasando na negociación colectiva do noso Convenio, bloqueado despois de 15 meses de negociación, é unha mostra da podremia absoluta do marco estatal de negociación colectiva.

Como xa dixemos, era de prever unha negociación dura: dura é a posición das distintas empresas no día a día e dura foi a posición patronal negándose a aplicar a suba salarial do ano 2009.

Primeiro, agardaron de xeito oportunista pola reforma laboral, unha reforma que queren traer ao Convenio alongando os prazos dos contratos temporais, e incluíndo un despido barato e doado do persoal indefinido.

Agora, queren agardar polo resultado (que sen dúbida será beneficioso para as empresas) da reforma da negociación colectiva que CEOE, CCOO e UGT negocian en Madrid.

A CIG deu resposta á reforma laboral e das pensións, daremos resposta á reforma da negociación colectiva e debemos dar unha resposta á situación do noso Convenio.

Por isto temos convocados os seguintes paros de 1 hora de duración:

DÍA	Quenda de NOITE	Quenda de MAÑÁ	Quenda de TARDE
30 marzo	00:00 a 1:00	12:00 a 13:00	18:00 ás 19:00
4 abril	00:00 a 1:00	12:00 a 13:00	18:00 ás 19:00
13 abril	00:00 a 1:00	12:00 a 13:00	18:00 ás 19:00

Cara ao día 30 de marzo consideramos importante que participedes concentrándovos cando a nós diante dos centros de traballo. Non é unha xornada festiva, nin de relax, é unha xornada para reivindicar o dereito a negociar unhas condicións dignas de traballo.

Convenio: dar a batalla ou tomar café

2011-03-21T02:08:00.000-07:00

Sabiamos que a negociación do Convenio Colectivo de Contact Center ía ser tremendamente difícil; xa a aplicación do Convenio anterior foi conflitiva, negándose a patronal a aplicar a suba salarial pactada. O que pasa hoxe era de agardar, pero da podremia do Convenio Estatal non é responsable só a patronal.

Durante 15 meses a negociación do Convenio foi bloqueada pola patronal, e nós insistimos, por pasiva e por activa, na necesidade de mobilizar ao sector, e convocamos folgas, asembleas e mobilizacións.

Non é a primeira vez que a patronal opta por unha posición pechada, a diferenza estriba en que, noutros procesos de negociación, os sindicatos fomos capaces de aparcar as diferenzas e traballar de xeito unitario, para impulsar mobilizacións coa forza suficiente para mover ás empresas.

A día de hoxe hai convocados paros de 15 minutos, unha proposta que non mancará ás empresas e que, polo tanto, terán pouca incidencia para conseguir mover á patronal. Ao que hai que engadir que algunha Sección Sindical dalgún sindicato convocante, nunha empresa en Galiza xa anunciou que non apoiará os paros.

Un paro ou unha folga é unha xornada reivindicativa e de loita, non 15 minutos para tomar café ou botar un “pitillo”.

A CIG non apoia estes paros, convocados para non se sabe que, xa que os atrasos que din que reclaman non son os que están pedindo na mesa. Nos vindeiros días continuaremos coas mobilizacións propias.

Queren deixarnos sen a suba salarial do 2010 e piden máis facilidades para despedir

2011-02-14T00:10:00.000-08:00

As empresas de telemárketing non queren convenio, queren esquilmarnos. Na reunión do día 4 de febreiro continuaron coa súa posición pechada:

Salarios 2010: Din que non procede subir os salarios en base ao IPC. Non actualizalos co 3% do IPC significaría un recorte salarial inxustificado.

Salarios 2011: Falan de que poderían subilo co IPC pero a cambio de modificar o apartado de contratación.

Contratación: Insisten en reducir a un 50% os contratos indefinidos; nós apostamos polo contrato indefinido como preferente eliminando os contratos por Obra.

Piden ampliar a contratación temporal, co alongamento dos contratos por Obra en 12 meses máis dos establecidos na reforma laboral. Unha reforma pola que convocamos unha folga o 29 de setembro, pero agora CCOO e UGT anunciaron nesta reunión estar dispostos a aplicala no sector, ampliando os contratos por Obra en 12 meses mais. Unha nova claudicación renunciando a loitar polo noso.

Así mesmo, as empresas insisten en ampliar as facilidades de despedimento que contempla o convenio para os temporais, estendéndoas ao persoal fixo.

Quede claro que a patronal non quere falar de contratación, quere falar de despedimentos. Non deberíamos dar unha resposta?

Dende a CIG solicitamos que no Convenio se impidan as cláusulas de extinción dos contratos por produtividade que estableceron algunhas empresas (que implica que no caso de non cumprir coa produtividade o traballador/a cesa na empresa voluntariamente, de balde e perdendo incluso o dereito ao paro).

Non mobilizarse é perder dereitos, sexa ante a reforma laboral, das pensións, ou na negociación do Convenio. Foi por iso que pensabamos que a situación do Convenio requiría unha folga e por iso fixemos un chamamento especial no noso sector cara a folga xeral do 27 de xaneiro.

O entreguismo das cúpulas sindicais de CCOO e UGT, que utilizan a representatividade que conseguen grazas ao aval que supón votar a estes sindicatos ou afiliarse a eles, favorece as reformas antisociais e impide que os traballadores e traballadoras de telemárketing teñamos un convenio xusto.

Nós continuaremos coas mobilizacións sociais contra as reformas e tamén coas mobilizacións por un Convenio digno e xusto, por un Convenio galego.

Convenio: a patronal só quere ampliar a temporalidade e axilizar os despedimentos

2011-01-18T15:20:00.000-08:00

Na reunión do día 17 de xaneiro, á que non puidemos asistir por quedar en terra os avións, a patronal que representa a todas as empresas de telemárketing, anunciou que o vindeiro 4 de febreiro presentará unha proposta para modificar os artigos 17 e 18 do Convenio, que sen esta modificación non será posible chegar a un acordo.

Despois dun ano coa negociación aberta, que non un ano negociando, veñen con que hai que ampliar a temporalidade e axilizar os despedimentos.

A reforma laboral avanzaba en equiparar temporais e fixos en canto a indemnizacións e facilidades para o despedimento, agora a patronal quere facer o mesmo no Convenio.

No telemárketing está claro que non hai problemas para facer contratos temporais de longa duración, nin para despedir polos motivos máis inxustos en calquera momento, o da patronal é unha pura provocación.

O mesmo que acontece coa reforma das pensións , CCOO e UGT continúan sentados para falar de recortes sen mobilizarse.

Se a alguén afecta a reforma das pensións é a nós: vivimos hoxe na precariedade e a padeceremos tamén no futuro. Esixir 41 anos cotizados para xubilarse con 65 implica cotizar de xeito ininterrompido dende os 24 anos, algo imposible co modelo actual de temporalidade/paro/temporalidade. Incrementar a cotización para ter dereito a pensión ata os 25 anos tamén nos afecta polo mesmo motivo.

Non cabe continuar sen mobilizarse, por iso o 27 de xaneiro a FOLGA XERAL convocada pola CIG debe ter un seguimento masivo no noso sector, está en xogo o noso futuro inmediato: o convenio, pero tamén o noso futuro a longo prazo.

Asembleas do sector en Vigo

2011-01-18T03:32:00.001-08:00

A CIG convoca asembleas no sector telemárketing cara a FOLGA XERAL e para informar da situación da negociación do Convenio.

En Vigo as asembleas estan convocadas para o vindeiro día 20 de xaneiro ás 12:30 horas e as 20:00 horas no local da CIG na rúa Gregorio Espino, 47.

Un ano sen Convenio e anos de precariedade

2011-01-12T04:04:00.001-08:00

Descarga, imprime, espalla e protesta.

Algúns datos para comprender a gran mentira da reforma das pensións

2011-01-12T00:56:00.001-08:00

1. O grupo de economistas que fai os informes para a Unión Europea, para a OCDE e para o Goberno, están contratados e pagados polo BBVA, Banco de Santander e CEOE.

2. No ano 1999 este grupo de economistas pronosticaban a creba das pensións para o ano 2010. No ano 2000 créase o Fondo de Reserva das Pensións, nestes 10 anos este fondo acumulou un excedente de máis de 64.000 millóns de €. No ano 2010 o superávit no 3º trimestre foi de 11.000 millóns de €, cun 14% máis de pensionistas que no ano 2000.

3. As medidas que pretende aprobar o Goberno de ampliar os anos de cálculo e a idade de xubilación, poderán reducir até un 25% a pensión nos próximos anos. Ao mesmo tempo que reforman as pensións, aprobaron reducir as cotizacións das empresas e subvencionar os despedimentos co diñeiro público. Isto representa máis diñeiro que o que aforran coa reforma das pensións.

4. Na proposta de reforma das pensións que queren aprobar incrementan o tope para as pensións máximas (banqueiros, empresarios, executivos, profesións liberais) para que poidan cobrar máis, e recortan aproximadamente un 10% as da clase traballadora. Recortan as dos pobres para darllo aos ricos.

5. O Estado Español é o que menos gasta en pensións da Europa dos 15, menos que Portugal que gasta o 11,4% do PIB*. O Estado Español gasta o 7,8%.

6. No ano 1995 o gasto en pensións no Estado Español representaba o 8,3% do PIB. No ano 2008, con 1.500.000 (un millón cincocentos mil) pensionistas máis e 2 millóns de desempregados máis que entón, o gasto é do 7,8%, un 0,5% menos.

7. Os resultados de superávit reprodúcense cada ano porque dependen do crecemento económico e do incremento anual de traballadores e traballadoras. Nos últimos 30 anos a clase traballadora creceu mais do dobre. En Galiza no ano 1980 non chegaba aos 430 mil. Hoxe pasa de 940 mil traballadores e traballadoras.

8. Na conxelación das pensións públicas no 2010, que afectou á clase traballadora, o Estado aforrou 1.530 millóns de €. Pero ao mesmo tempo perdeu 1.440 millóns de € pola desgravación fiscal que lle fai aos ricos das pensións privadas contratadas en bancos e aseguradoras .

9. Os que aproban estas medidas non reforman as súas pensións. Os deputados e senadores con 7 anos de mandato teñen asegurado o 80% da pensión máxima, (uns 30.000 € ao ano) e poden xubilarse aos 60 anos. Se perden o escano, cotízanlles até a xubilación.

10. O Estado Español triplica a media de contratación temporal precaria de Europa. Estes traballadores e traballadoras temporais nunca chegarán aos 35 anos para cobrar o 100% da pensión e teranse que xubilar mais tarde e cobrarán menos. Con menos temporalidade produciríanse máis ingresos. Ao final, os que teñen o traballo mais duro e máis precario terán a peor pensión.

A pensión media é de 876€/mes. En Galiza, de 728€. Esta é a pensión da clase traballadora, a dos ricos supera os 3000€. A clase traballadora asociada a traballos de dureza e fatiga (automóbil,naval, construción, pedra, mar, conserva, téxtil, limpeza, etc), vive un promedio de dez anos menos que os executivos, banqueiros, xuíces, notarios, empresarios, profesións liberais, etc. Viven máis os que cobran as pensións mais altas.

O maior fraude á Seguridade Social cométeno as Empresas. Contratos a media xornada ou por horas pero traballando realmente toda xornada. Tamén nas horas extras que non cotizan. No informe de Facenda do ano pasado o 90% dos empresarios aseguran ingresar menos de 1000€ ao mes.

Esta é a democracia dos ricos, na que o capitalismo financeiro quere controlar as pensións. Billóns de euros, que logo irán ás accións das grandes empresas na Bolsa. Por isto queren a reforma. Lembra que so tres grupos políticos rexeitaron a reforma laboral e esta reforma das pensións: BNG, IU e ERC. Loita tamén co teu voto.

Non permitamos este ataque aos nosos dereitos, porque non pensan parar. Seguirán reformando e empobrecendo as pensións. O noso futuro, os dos novos traballadores e traballadoras debemos defendelo agora.

Oito preguntas sobre a reforma das pensións

2011-01-12T00:55:00.001-08:00

O Goberno español continúa na súa política de entrega á defensa dos intereses da banca e das empresas multinacionais e agora tócalle á reforma do sistema público de pensións, unha fonte de recursos pola que leva moitos anos suspirando a oligarquía financeira, promovendo continuamente informes, pagados pola propia banca, nos que se anuncia, de forma interesada, a quebra do sistema público de pensións, predicións que nunca se cumpren pois carecen de todo rigor científico.

O verdadeiro obxectivo destes informes, sempre acompañados dun forte apoio mediático, é sentar dúbidas na maioría da poboación sobre o futuro das pensións públicas e fomentar que aquelas persoas que teñan capacidade de aforro o deriven a fondos privados de pensións, cos que a banca vai especular e cobrar suculentas comisións; en definitiva, facer un bo negocio. Os intentos, pois, do Goberno de modificar o sistema público de pensións obedece a razóns políticas e non técnicas, baséase en falsidades e busca unicamente favorecer os intereses do sector financeiro.

Cales son as propostas que fai o Goberno para esta nova reforma?

Entre outras modificacións o Goberno propón os seguintes cambios:

- Aumentar a idade legal de xubilación aos 67 anos, na perspectiva de situala nos 70 anos, así como igualar a idade media real de xubilación (62,6 anos) coa idade legal dos 65.

- Incrementar o número de anos que se collen para calcular a base reguladora a partir da cal se calcula a cantidade a cobrar de pensión.

- Aumentar a contía das pensións máximas (banqueiros, empresarios, executivos, profesións liberais…).

Cales son as consecuencias desta reforma?

- Esta reforma do sistema de pensións, ao igual que ocorreu coas reformas anteriores, o que busca e dificultar o acceso ás pensións e reducir a contía das pensións futuras, deixando as pensións públicas nunhas contías mínimas.

- Dificulta o acceso a unha pensión, vía ampliación do número de anos para ter dereito á mesma. Naqueles sectores con condicións de traballo máis duras, non van poder agardar a cumprir os 67 anos para xubilarse e van optar por facelo antes, co conseguinte recorte na contía das súas pensións. A maiores, se se pretende igualar a idade real da xubilación coa idade legal, vanse adoptar medidas para dificultar o acceso á xubilación voluntaria ou á xubilación parcial con contrato de relevo, mentres que con cartos públicos se subvenciona a permanencia no traballo daquelas persoas que polo tipo de funcións que realizan e pola contía do seu salario queren seguir traballando aínda que xa chegasen á idade de xubilación.

- Recorta a contía das pensións futuras ao incrementar o número de anos para calcular a base reguladora (temos que ter en conta que a pensión media galega é tan só de 728,24 euros). Se se pasa dos 15 anos actuais a 20 anos, vai supor unha perda de media dun 6% (a pensión media quedaría en 684,55 euros) nas pensións e se se incrementa de 15 anos a 25, que parece ser que é a pretensión do Goberno, a perda vai ser dun 10% (a pensión media quedaría en 655,45 euros), e non digamos xa se o que se fai é coller toda a vida laboral (35 anos) pois o recorte sería do 20% (a pensión media sería de 582,59 euros).

Cal é a idade de xubilación nos países da Unión Europea?

En todos eles, nestes momentos, non se supera a idade legal dos 65 anos, outra cousa é que as directrices da Unión Europea, presionada polos mercados financeiros, sexan a de instar os países que a integran a que atrasen a idade de xubilación aos 70 anos. Polo que respecta á media da idade real de xubilación estaba, no 2008, en 61,4 anos, sendo a media do Estado español unha das máis altas, con 62,6 anos.

Ver o seguinte cadro:

Son certas as análises que din que o sistema público de pensións non é viábel de cara ao futuro?

NON, parten de hipóteses manipuladas e parciais para xustificar esta tese. De feito as predicións que fixeron até o de agora de que o sistema sería deficitario, primeiro para o ano 2000 e despois para o 2005, foron claramente equivocadas. Nestes momentos a Seguridade Social ten un Fondo de Reserva de 65.000 millóns de euros. Pero é máis, no terceiro trimestre do 2010, con máis de catro millóns de parados en todo o Estado (20% da poboación activa), o superávit da Seguridade Social é de 11.000 millóns. Que porcentaxe de persoas desempregadas agardan para o ano 2040 ou 2050 estes “expertos” que anuncian a quebra do sistema público de pensións? Un 40%?

Os defensores desta tese parten da base de que a evolución demográfica vai provocar que o número de xubilados cada vez sexa maior en comparanza co de traballadores en activo, o cal fai imposíbel que haxa recursos suficientes para financiar as pensións, se non se introducen cambios no modelo actual. Os cálculos que fan os defensores desta tese é que o peso das pensións en porcentaxe do PIB pasará do 8% no 2007 ao 15,1% no 2060, o que sería imposíbel de soster pois absorbería uns recursos totalmente necesarios para destinar a actividades e servizos do resto da poboación. Estes sisudos técnicos ignoran, deliberadamente, á hora de chegar a esta conclusión, outra serie de variábeis que inciden tamén directamente na solución a este problema:

1º.- Neste mesmo período de tempo (2007-2060) as previsións de crecemento do PIB serían da orde de 2,23 (o PIB do 2060 sería 2,23 veces maior que o PIB do 2007), o cal permitiría dedicar unha porcentaxe maior da actual a investimentos e servizos para o resto da poboación que non fosen pensionistas. Outro exemplo clarificador a este respecto é o seguinte, no ano 1995 o gasto en pensións no Estado español representaba o 8,3% do PIB e a finais do 2008 o gasto representa o 7,8% do PIB, un 0,5% menos, a pesar de se ter incrementado o número de pensionistas en 1,5 millóns, neste período de 13 anos.

2º.- Basean toda a súa argumentación no desequilibro financeiro que se vai producir no sistema público de pensións, debido ao incremento do gasto e a caída dos ingresos, como consecuencia do aumento do número de xubilados e a redución en proporción do número de traballadores/as en activo. O que non avalían estes “expertos” é que neste equilibrio, ingresos/gastos, ademais do avellentamento da poboación inflúen outros moitos factores como son: o crecemento económico, o número de empregados e desempregados existente, a calidade dos salarios, distribución da renda, a política fiscal, a produtividade, a taxa de actividade, o peso da economía somerxida ou o nivel de emprego feminino. Só no caso de que todas estas variábeis tivesen unha evolución negativa poderían presentarse problemas ao sistema. Que estas variábeis teñan evolución negativa ou non, depende do modelo de desenvolvemento económico e social que se adopte e polo tanto das decisións políticas correspondentes.

A quen lle interesa e favorece a análise que defende a non viabilidade do sistema público de pensións?

O interese de cambiar o sistema público por un privado, non responde a unha necesidade real nin a razóns técnicas. Responde a razóns de tipo ideolóxico e ao interese económico da banca e demais entidades financeiras, interesadas en se facer cun negocio moi lucrativo. Eles son os que teñen présa para reformar o sistema de pensións porque queren solucionar os seus problemas de liquidez o máis rápido posíbel e a conta dos de sempre. Os estudos que defenden a inviabilidade e a quebra do sistema público de pensións proceden da banca ou de sisudos técnicos pagados por ela. Hai outros expertos, que non viven do sector financeiro, nin comungan coas teorías económicas neoliberais, que defenden e teñen demostrado todo o contrario, que o sistema público é perfectamente viábel e que non é necesaria a súa privatización, nin parcial nin total. Claro está, estes estudos non son divulgados polos grandes medios de comunicación de masas.

É máis beneficioso e garantista o sistema privado que o sistema público?

Claramente NON. Calquera sistema privado de aforro, que é o que realmente son os fondos de pensións, ten menos garantía e menos solvencia que un sistema público. Cando unha traballadora ou un traballador subscribe un plan de pensións privado, o que está a facer é depositar parte dos seus ingresos nun fondo que vai xestionar unha entidade financeira. Esta inviste ese diñeiro no mercado financeiro buscando a súa revalorización a través de procedementos, moitas veces, puramente especulativos; polo tanto, a rendibilidade deses fondos privados non está asegurada pois depende dos vaivéns dos mercados financeiros, que por definición son inestábeis e volátiles (sirva como exemplo que só durante o ano 2010 perdéronse máis de 2.000 millóns de euros dos fondos de pensións privados do Estado español), así como de outros factores como a propia inflación ou a porcentaxe desa rendibilidade coa que queda a propia entidade financeira que xestiona o fondo. En definitiva, os fondos privados non poden garantir unha remuneración determinada cando chegue a hora de facerse efectivos como pensión. Estamos a falar pois dun sistema inseguro e inxusto desde un punto de vista social.

Cales son pois as vantaxes dun sistema público de pensións?

O sistema público de pensións no Estado español correspóndese co modelo coñecido como de REPARTO: as pensións dos xubilados páganse coas achegas que fan á Seguridade Social os traballadores/as en activo. É polo tanto un sistema seguro, solidario entre as distintas xeracións de traballadores/as, non sometido aos vaivéns dos mercados financeiros nin ao negocio dos bancos, máis eficaz fronte ao problema da inflación, protector para cos sectores máis débiles da sociedade, pois nun sistema privado aqueles que non tivesen suficiente capacidade de aforro, durante a súa vida laboral, quedarían destinados a vivir practicamente da mendicidade. Polo tanto, o sistema público de reparto é un sistema máis xusto e garantista para toda a poboación.

Corre polo tanto perigo o sistema público de pensións?

Os perigos para o sistema público veñen derivados precisamente do modelo e das políticas neoliberais. Os altos índices desemprego, o emprego en precario, a baixa taxa de emprego feminino, os baixos salarios, o alto nivel de economía somerxida, a especulación financeira, a deterioración do tecido produtivo, a fraude fiscal, o reparto desigual da riqueza… todos eses factores son os que poden terminar poñendo en auténtico perigo o sistema público, se non se corrixen. Por iso é tan importante mobilizarse e, coa nosa forza e co noso voto, mudar estas políticas e facer posíbel un novo modelo económico e social máis xusto, solidario, igualitario e democrático.

Galiza, xaneiro de 2011

A patronal saca o látego de 9 puntas e a navalla de 7 estralos

2010-12-13T04:53:00.000-08:00

Resumo da negociación do Convenio en Madrid.

A patronal falou por fin das súas propostas para pechar un acordo o máis rápido posible, mentres propón a vindeira reunión para o 17 de xaneiro de 2011.

As súas propostas non teñen desperdicio. En materia de salarios propoñen que non subilos a principio de cada ano, que se faga a posteriorí, mentres en materia de contratación queren simplificar os despedimentos de fixos e temporais.

Salarios, proposta patronal

Din que non están dispostos a volver a firmar unha suba salarial ligada ao IPC previsto. Propoñen, en consonancia, que os salarios non suban a principio de ano, que se paguen atrasos unha vez vencido o ano cando se coñeza o IPC definitivo do ano anterior.

A modo de exemplo, a suba correspondente ao 2011 cobraríase como atrasos no 2012 cando se publicase o IPC definitivo.

Proposta CIG: Defendemos unha suba lineal de 540 euros para todo o persoal correspondente ao ano 2010.

Contratación, proposta patronal

Subir indefinidos ao 50%. A cambio, o despedimento do persoal temporal e indefinido podería realizarse, en aplicación do artigo 17, coa única proba documental dun certificado do cliente da baixada do volume de traballo.

Con ese novo artigo o despedimento do persoal indefinido sería a través dun ERE, que sería solicitado á Comisión Paritaria para que elaborase un informe vinculante para todos os Comités de todas as empresas.

Se o número de despedimentos non chegase ao preciso para considerarse colectivo, estes terían a consideración de obxectivos; ACCE di que está disposta a falar dunha indemnización de 20-25 días por ano traballado.

Pero non queda aí, xa que en relación aos contratos temporais queren ampliar os novos contratos por Obra que se realicen ata os 4 anos (coa reforma laboral os novos contratos considéranse indefinidos aos 3 anos).

Queren modificar o artigo 18, para que en caso de subrogación, a obriga de contratar ao persoal que viña prestando servizo na anterior empresa de telemárketing baixe ao 50%.

Proposta CIG: Como no resto de sectores os contratos serán indefinidos, regulando e limitando as distintas modalidades temporais atendendo á causalidade. Despois dos anos transcorridos, o telemárketing é un sector consolidado e non caben máis excepcións a favor das empresas.

Para rematar, despois de “estirarse” nas súas propostas, queren estirar a negociación, aprazando a seguinte reunión para o vindeiro 17 de xaneiro.

Permiso Hospitalización: asinamos un acordo sectorial

2010-11-30T04:15:00.000-08:00

O pasado día 29 de novembro tivo lugar no SIMA (Servizo Interconfederal de Mediación e Arbitraxe) en Madrid, un acto de mediación no que conseguimos un acordo para todo o sector.

Dito acto, é o paso previo a presentación dun Conflito Colectivo para conseguir o recoñecemento do dereito á utilización do permiso remunerado de tres días por accidente, enfermidade grave u hospitalización de familiar, con independencia de que dito familiar xa recibira a alta hospitalaria.

Outros sindicatos xa comunicaron o contido da sentenza do Tribunal Supremo de 21 de setembro, recurso 84/2009, referida á empresa Atento.

Finalmente no citado acto no SIMA, a patronal ACCE (Asociación Contact Center Española) e todos os sindicatos, incluído a CIG, asinamos un acordo para que a citada sentenza sexa de aplicación en todo o sector de Telemárketing.

Convenio de transición?, non grazas.

2010-11-28T01:22:00.001-08:00

Na negociación do convenio colectivo están en xogo as nosas condicións laborais, a suba salarial, horarios e xornada, permisos, saúde laboral ou o réxime de despedimentos, algo, por outra banda, desgraciadamente habitual no sector.

Levamos 11 meses coa mesa de negociación do Convenio Colectivo de Telemárketing aberta, sen ningún tipo de avances debido á posición pechada e oportunista da patronal.

Durante este tempo, malia a nosa predisposición, non houbo unha soa medida de presión conxunta. CCOO e UGT nin contestaron ás nosas propostas de unidade de acción.

Así mesmo, a negociación deste Convenio vén precedida dun Acordo Estatal de Negociación Colectiva, asinado entre a CEOE (na que están integradas as empresas de telemárketing), CCOO e UGT, para topar a suba salarial no 1% nos convenios que se negocian este ano.

Con este panorama, o 25 de novembro tivo lugar unha reunión en Madrid entre as cúpulas da CEOE, CCOO e UGT para “intervir” na negociación de 170 convenios bloqueados, supoñemos que entre eles está o noso.

Ao fío disto, o día 26 de novembro na mesa negociadora do Convenio de Telemárketing, CCOO e UGT propuxeron un “convenio de transición por dous anos”, é dicir que nos suban os salarios un 1% e os resto todo siga igual de mal.

Dende a CIG anunciamos que hai que falar da suba salarial, non dun miserable 1% dende logo, e sobre todo da contratación. Así se quedou para o mes de decembro.

En definitiva estamos ante unha mostra evidente da podremia do marco estatal de negociación, un marco favorable á patronal e negativo para os traballadores e traballadoras, que nos reafirma na nosa proposta de Convenio Galego para os Centros de Chamadas.

A tartaruga segue o seu paso

2010-11-19T04:46:00.001-08:00

Tras o paro no proceso de negociación decidido pola patronal, o pasado venres 12 de novembro tivo lugar una nova reunión da “mesa negociadora” na que se abordaban os puntos relativos a excedencias, clasificación e promoción profesionais e prevención, seguridade e saúde no traballo.

Dende a CIG volvemos defender as propostas incluídas na nosa plataforma ao respecto dos puntos a tratar, que detallamos:

Incluír no convenio unha definición estrita de cada unha das categorías profesionais recollidas.
Recoller dúas novas categorías profesionais:

Teleoperador/a de 1ª, que será alcanzada de xeito automático cando un teleoperador/a especialista leve 2 anos prestando servizo. O salario será o de teleoperador/a especialista e o 4% de incremento.
Xestor/a de 1ª que será alcanzada de xeito automático cando un xestor/a leve 2 anos desempeñando as funcións correspondentes Á súa categoría. O salario será o de xestor/a e o 4% de incremento.

Desaparición do artigo 40, xa que a Comisión creada no anterior Convenio non serviu máis que para proporcionar máis liberados/as aos sindicatos asinantes, sen chegar a ningunha conclusión, nin demostración do traballo feito.
Que o tempo entre chamadas non poderá ser inferior a 50 segundos, tanto en postos de emisión como de recepción de chamadas.
Incrementar a duración das pausas PVD de 5 a 7 minutos.
Que a representación legal dos traballadores/as poderá rexeitar a Mutua contratada pola empresa.
Que as empresas teñan a obriga de subscribir a favor dos seus traballadores/as unha póliza de seguros que cubra por accidente (laboral ou común), durante as 24 horas do día, os riscos de morte, invalidez permanente absoluta ou permanente total, así como a gran invalidez, na contía de 20.000 euros.

De novo a actitude da Patronal denota o seu interese de paralizar a negociación do convenio, e de seguir recortando os poucos dereitos dos traballadores e traballadoras do noso sector, solicitando eliminar a posibilidade de pedir excedencias especiais, non querendo avanzar no que respecta a clasificación profesional e recortando o número de pausas PVD que nos corresponden, xa que non lles agradou a sentenza do Tribunal Supremo a este respecto, e da que actualmente seguen a facer interpretacións.

Ante esta situación, dende a CIG, tentamos acordar un calendario de mobilizacións conxuntas coas outras centrais sindicais, pero non tivemos contestación, polo que estamos elaborando o noso propio calendario de actuacións, xa que é necesario de mobilizar o sector para desbloquear a negociación e conseguir avances reais.

Exitos dos paros en Galiza

2010-10-25T11:45:00.001-07:00

Galiza foi a nación do Estado onde os paros convocados a nivel estatal pola situación da negociación do Convenio do sector de telemárketing tiveron un maior seguimento, despois de que a CIG decidira sumarse á convocatoria, que non foi apoiada nin por CCOO, nin por UGT.

O paro dunha hora, na quenda de mañá das 12 ás 13 horas e na quenda de tarde das 18 ás 19 horas, foi un éxito en toda Galiza, nomeadamente nas cidades da Coruña e Vigo que concentran o maior número de empresas.

A folga afectou a todas as campañas que atenden estas subcontratas e durante a mesma os teleoperadores e teleoperadoras concentráronse diante dos respectivos centros de chamadas en demanda dun convenio digno. Os paros non foron apoiados nin por CCOO, nin por UGT.

Negociación bloqueada

A negociación do convenio de telemárketing está bloqueada dende principio de ano debido a actitude prepotente da patronal que, inicialmente defendeu atrasala até que estivera aprobada a reforma laboral para aplicala no Convenio Colectivo e que agora pretende atrasala novamente á espera da reforma da negociación colectiva.

Xa antes do verán a CIG trasladou aos distintos Comités de Empresa a proposta de realizar mobilizacións. Porén, as diferenzas sindicais impediron daquela chegar a un acordo despois de que a maior parte das outras centrais que, segundo CIG-Telemárketing, “actúan como franquicias” anunciaran que tiñan que pedir autorización ás súas direccións de Madrid.

Neste momento a CIG estuda un calendario de novas mobilizacións no sector para evitar que a patronal tire beneficio das reformas antisociais do goberno central do PSOE.

Precariedade arrastrada desde o anterior convenio e deslocalización

Desde o sector de telemárketing do sindicato nacionalista lembran que durante o período 2007-2009, no que se aplicou o anterior convenio que mantivo as precarias condicións laborais, as empresas reduciron no Estado 1.741 postos de traballo.

No mesmo período as mesmas empresas crearon 15.052 postos de traballo en terceiros países, froito dunha deslocalización sen límites coa complicidade dos gobernos autonómico, central e da AEPD (Axencia Estatal de Protección de Datos).

Diante desta situación, para a CIG-telemárketing queda claro que a precariedade e os baixos salarios non son a receita fronte a deslocalización.

A CIG avaliará a convocatoria dunha nova folga xeral

2010-10-21T23:33:00.000-07:00

A CIG anunciou esta mañá, en rolda de prensa, a convocatoria de mobilizacións no mes de novembro, para exixir novamente a retirada da reforma laboral, para demandar que non se leve a cabo a reforma das pensións e para demandar medidas estruturais dirixidas a mudar o actual modelo económico neoliberal, por outro máis xusto e sustentábel. O día 3 de novembro, está convocada unha asemblea nacional de delegados, que rematará cunha manifestación en Compostela, e o día 18 celebraranse manifestacións en todas as cidades, entre as 19:00 e as 20:00 horas.

Suso Seixo, secretario xeral, adiantou que se iniciarán contactos con CCOO e UGT para trasladarlles a disposición da CIG de continuar coas mobilizacións e mesmo convocar unha folga xeral e para coñecer a súa opinión ao respecto. Neste sentido, sinalou que a central sindical analizará, en función da resposta ás mobilizacións convocadas en novembro e dos resultados das conversas con estas organizacións sindicais esa posibilidade, porque dixo “é algo moi serio, que non se pode facer á lixeira”.

En todo caso, advertiu que “se a situación se mantén e se a reforma das pensións se leva a cabo, tal e como se prevé, en decembro, ou a principios de ano, a CIG avaliará, tendo en conta todas estas variábeis, a convocatoria dunha folga xeral mesmo de forma unilateral”.

De facer esa convocatoria en Galiza sen contar con CCOO e UGT, a CIG valoraría a posibilidade de facela coincidir con folgas xerais noutras nacións do estado.

Para Suso Seixo, o éxito da recente folga xeral demostrou que, malia o contexto no que se convocaba, mesmo cando xa estaba aprobada a reforma laboral, os traballadores e traballadoras depositaron a súa confianza nas centrais sindicais, que teñen agora que estar á altura das circunstancias e seguir dando resposta aos ataques do goberno contra a clase traballadora. “Facer outra cousa, sería xerar a frustración e traizoar esa confianza”.

Reforma laboral

O secretario xeral da CIG cuestionou a “actitude intransixente” do goberno e a súa falta de sensibilidade coas demandas sociais. Actitude que contrasta coa submisión que amosa diante das exixencias do capital financeiro canalizadas a través do FMI, do que lembrou que acaba de pedirlle ao estado español que flexibilice aínda máis o mercado laboral e un Plan B, por se fora necesario aplicar novos recortes. “Non nos sorprende este escenario, por iso cremos que fronte á imposición dun modelo económico e social como este hai que continuar coas mobilizacións”.

Seixo tamén sinalou que coa remodelación do goberno non se van mudar as políticas, afirmando que “non dependen de Valeriano Gómez –o novo Ministro de Traballo-, son políticas do goberno e do partido que o sustenta”.

Aínda así, anunciou que a CIG solicitará unha entrevista co novo Ministro, para manifestar “a oposición da central sindical ás reformas e a nosa firme disposición a seguir mobilizándonos”. Unha entrevista que entende que tería que ser o propio Ministro quen a solicitara, “para coñecer a opinión das centrais sindicais máis representativas, e a CIG é unha delas”

Reforma das pensións

Respecto da reforma das pensións, coa que se pretende atrasar a idade de xubilación e aumentar o período de cálculo denunciou que desde os diferentes medios estase a dar voz a aqueles que afirman que se trata dunha reforma inevitábel para xustificala. Como exemplo puxo as informacións nas que se recolle a opinión do Grupo dos 100 economistas, que dependen dunha Fundación controlada pola Banca e as grandes empresas multinacionais españolas.

Fronte a isto, demandou tanto aos medios de comunicación como ao propio goberno que se fagan eco tamén daqueles outros estudos independentes que demostran que está garantida a sostibilidade da caixa da Seguridade Social e, polo tanto, o sistema de pensións.

Mobilizacións en Francia

Respecto do éxito que están a ter as mobilizacións en Francia, Suso Seixo afirmou que están plenamente xustificadas e que dado o calado das reformas que xa se nos impuxeron e as que se nos pretenden impor en breve “teríamos aquí moitos máis motivos para mobilizarnos que os franceses”.

Neste sentido alertou de que o espírito que subxace en todas as reformas é precarizar máis o mercado laboral, favorecer o incremento da xornada e seguir rebaixando os salarios, algo que posibilita a reforma laboral ao permitir o descolgue dos convenios para incumprir as cláusulas de revisión salarial. Todo isto, co obxectivo último de reducir até nun 25% os salarios no ámbito do estado, para favorecer as exportacións, abaratando os prezos dos produtos, a custo dos traballadores.”

A CIG apoia os paros do día 21 de outubro polo noso convenio

2010-10-18T07:58:00.000-07:00

O pasado venres desprazámonos a Madrid para a reunión da mesa negociadora do Convenio de telemárketing, para a nosa sorpresa a patronal anunciou que non seguiría negociando debido a convocatoria de paro e folga realizada pola CGT.

Xa antes do verano a CIG propuxo nos distintos Comités de Empresa das empresas de telemárketing en Galiza a posible convocatoria conxunta de protestas ante a falta de avances na negociación do Convenio. Entendendo que as mobilizacións deberían contar co máximo apoio posible. Non o fixemos público dado que non buscábamos protagonismo, queríamos que as mobilizacións foran conxuntas.

Así mesmo somos partidarios de que as mobilizacións sexan explicadas con carácter previo aos traballadores e traballadoras convocando as respectivas asembleas, algo que non se deu neste caso concreto.

Somos partidarios polo tanto das mobilizacións, pero a convocatoria das mesmas de xeito unilateral e sen tempo para explicarllo aos protagonistas das mesmas non nos parecía o camiño correcto, ata o pasado venres.

Agora ben, a actuación prepotente da patronal merece unha resposta, xa que está paralizando a negociación a espera da anunciada reforma da negociación colectiva que se está negociando en Madrid entre CEOE, CCOO e UGT, pero que o goberno xa anunciou fará por decreto si non hai acordo como xa fixo coa reforma laboral que nos levou a folga xeral do 29 de setembro.

A reforma da negociación colectiva forma parte do paquete de medidas antisociais e de recortes, a patronal CEOE pretende incluso que os convenios perdan o carácter normativo e que sexan de aplicación só naquelas empresas que queiran aplicalo, convertendo os Convenios en papel mollado.

Neste senso o retraso premeditado da negociación, buscando escusas a todas horas merecen unha resposta, é por iso que a día de hoxe temos decidido apoiar os paros convocados para o día 21 de outubro de 12:00 a 13:00 pola mañá e de 18:00 a 19:00 pola tarde no sector de telemárketing.

Paremos o 29 de setembro (II)

2010-09-23T23:53:00.000-07:00

Con esta reforma amplían a posibilidade dos despedimentos por faltas xustificadas pero intermitentes, que acaden o 20 % das xornadas hábiles en dous meses consecutivos, ou o 25 % en catro meses descontinuos dentro dun período de doce meses, incluídas baixas por enfermidade, permisos por morte dun familiar ou por coller días de mudanza. Tratan en definitiva que traballemos enfermos ata a extenuación e que renunciemos aos dereitos adquiridos.

Hai que insistir que na práctica esta Reforma transforma ao persoal indefinido en temporal; como exemplo, a indemnización de despedimento que pagarán as empresas en despedimentos obxectivos será de 12 días (os outros 8 os pagará o FOGASA), nos contratos temporais a indemnización será de 12 días (no 2015). Se costa o mesmo despedir a un fixo que a un temporal ¿hai traballos fixos?, evidentemente non.

Pero coa Reforma, ¿perder o posto de traballo é o peor que nos pode pasar? A reforma laboral tamén establece medidas para conseguir máis “flexibilidade” para as empresas, é dicir, maior precariedade laboral.

Igual que nos despedimentos amplían as vías polas que as empresas poderán modificar condicións substanciais por causas técnicas, económicas ou organizativas, poderán impoñer mobilidade xeográfica; deixar de pagar os salarios pactados nos convenios; ou poderán reducirnos a xornada laboral (as horas de traballo que figuran nos contratos) co correspondente recorte nos salarios.

Falan que a reforma laboral pon coto á temporalidade; totalmente falso: os contratos temporais realizados con anterioridade a aprobación da reforma non se verán afectados. Ademais amplían o campo de actuación das Empresas de Traballo Temporal creando a figura de axentes privados de colocación.

Por outra parte e máis alá da subvención do despedimento con cargo ao FOGASA, a reforma insiste na liña de bonificar a contratación por parte das empresas.

Moitos traballadores e traballadoras non son conscientes do alcance da contrarreforma. Estamos ante a implantación definitiva dun novo modelo baseado na precariedade máis absoluta no que as empresas poderán prescindir unilateralmente dos dereitos laborais, despedirnos, deixar de aplicar os convenios, decidir trasladarnos ou recortarnos a xornada e o salario.

Por todo isto, o 29 DE SETEMBRO, ¡¡¡ FOLGA XERAL !!!

+ De “28 semanas despois”

2010-09-23T23:48:00.000-07:00

Nove meses (36 semanas) despois de que rematase a vixencia do Convenio abordamos na mesa “negociadora” a ordenación do tempo de traballo e seguimos dándolle voltas sen intención de avanzar en nada. Pensamos que as propostas da patronal falan por si soas, así que pasamos a expoñervos o anunciado polas empresas de Telemárketing e as nosas propostas:

Cómputo Xornada:

Proposta ACCE

Proposta CIG

Eliminar referencia á xornada semanal (poderían asignarnos os horarios de xeito flexible, unha semana traballas 30 horas, a seguinte 10, etc.).

Computar a xornada irregular en cómputo anual (o mesmo). E aplicar tamén a xornada irregular para os contratos a tempo parcial a 30 horas.

Reparto do tempo de traballo para crear emprego, establecendo a xornada semanal de 35 horas.

Xornada irregular: máximo de 7 días seguidos con 2 días de descanso ininterrompido.

Tempo Descanso durante a xornada (independente das pausas PVD):

Proposta ACCE

Proposta CIG

Reducir a 15 minutos.

Dada a carga mental do traballo que desenvolvemos propoñemos:

De 4 a 6 horas de traballo, 20 minutos.

De 6 a 8 horas, 35 minutos.

Máis de 8 horas, 50 minutos.

Libranza fin de semana ao mes:

Proposta ACCE	Proposta CIG
Manter os 2 actuais.	Incrementar a 3 fines de semana libres ao mes.

Quendas:

Proposta ACCE

Proposta CIG

Ampliar a quenda de mañá de 6 a 17, e a de tarde das 14 á 1 da mañá.

Con horario partido, a xornada poderá finalizar ás 21 horas, e o tempo entre a xornada de mañá e a de tarde poda ser maior de 2 horas.

Suprimir negociación colectiva para a ampliación das bandas horarias.

60% do persoal de cada campaña en quenda continua.

Vacacións:

Proposta ACCE	Proposta CIG
Como están.	Contemplar a sentenza do Tribunal Supremo que establece o dereito as vacacións non disfrutadas por IT.

Permisos retribuídos:

Proposta ACCE

Proposta CIG

As 35 horas para ir ao médico serán proporcionais á xornada contratada e á duración do contrato.

Solicitamos os seguintes permisos:

Aumentar as horas de asistencia ao médico, tanto se é da Seguridade Social como non, a 80 horas anuais e incluír dentro destas as de acompañamento ao médico a menores de 14 anos e ascendentes maiores de 65 anos.

Aumento de todos os permisos ata o 3º grao de parentesco.

Equiparar o permiso de días libres por matrimonio a parellas de feito.

Incluír un novo permiso de 3 días de libre disposición.

E despois disto rematou a reunión, marcando unha nova para o 15 de outubro. Perdemos o tempo falando do tempo (de traballo, iso si).

Paremos o telemárketing o 29 de setembro (I)

2010-09-21T16:44:00.000-07:00

Si algo sabemos no telemárketing é que despedir é doado e barato, que os contratos temporais son a norma, que as empresas teñen toda a flexibilidade do mundo e malia todo isto nos últimos cinco anos crearon emprego pero fora do estado froito da deslocalización. Abaratar e recortar dereitos non garante a creación de emprego, garante precariedade laboral.

O goberno central impón unha reforma laboral que aposta por desprotexer totalmente aos traballadores/as, unha reforma que abarata, facilita e amplía as causas de despedimentos, amplía o uso de ETT, e permite as empresas recortar salarios ou reducir xornadas.

A crise é unha escusa para impoñer un novo modelo económico, social e laboral. Por iso a CIG convocou FOLGA XERAL o 29 de setembro.

Co actual Convenio os despedimentos son doados e baratos para as empresa e agora, coa reforma, queren facilitalo aínda mais, abaratalo e subvencionar ademais con diñeiro público parte das indemnizacións de despido e se amplían as causas dos despedimentos obxectivos.

As empresas poderán alegar previsión de perdas para proceder ao despedimento individual ou colectivo con unha indemnización de 20 días por ano ata un máximo de 12 mensualidades.

Tamén será causa de despido obxectivo a diminución de ingresos con independencia de que as Empresas obteñan beneficios no mesmo exercicio.

O despedimento por causas obxectivas por razóns técnicas, organizativas , económicas e de produción, tamén se flexibilizan polo que a implantación de novos elementos técnicos ou o reemplazo de máquinas permite o despido.

Poderán despedirnos con mais facilidade polo simple feito de faltar ao traballo por causas xustificadas, ben sexa por estar de baixa, pedir días por ter un familiar enfermo ou coller dous días de mudanza. Unha sen razón que pretende que traballemos ata rebentar e que renunciemos sen mais aos dereitos adquiridos.

Así mesmo, a reforma afecta noutras cuestións máis alá dos despedimentos que explicaremos posteriormente. Estamos vendidos, a democracia esvaeceuse dos postos de traballo, vivimos na ditadura dos empresarios. As reformas conformarán a estrutura dun novo modelo laboral, económico e social onde temos as de perder.

Os traballadores e traballadoras do sector do telemárketing temos motivos de abondo para ir á FOLGA sen que houbera reforma laboral, pero agora que pretenden impoñernos máis precariedade, mais despedimentos e recortes salariais debemos unir as nosas forzas e participar activamente na FOLGA XERAL DO 29 DE SETEMBRO. Indo a folga, asistindo aos piquetes e as mobilizacións convocadas. Paremos as empresas e aos seus gobernos-monicreques.

Contra a reforma, mobilizámonos nas ETT... e o goberno reprime a protesta

2010-09-21T03:27:00.000-07:00

O 17 de setembro a CIG-Mocidade realizou unha xornada de protesta en toda Galiza con mobilizacións en diversas Empresas de Traballo Temporal. No caso concreto de Vigo a ETT elexída é ADER, unha das que traballa con Bosch e da que todos e todas coñecedes o seu comportamento.

Na nosa empresa ata un 60% do persoal pode chegar a estar contratado por esta vía. Ese foi un dos cabalos de batalla dende a chegada da CIG ao Comité. Agora a reforma laboral do PSOE amplia a contratación vía ETT, como si non fose suficiente a temporalidade e precariedade que vivimos ata o de agora. Por iso delegadas da CIG en Bosch participaron na protesta.

A mobilización desenvolveuse de xeito pacífico e sen incidentes, ocupando os convocados os locais de ADER durante aproximadamente unha hora.

A sorpresa foi despois de que rematara a protesta sen incidentes, cando un amplo despregue da policía nacional (3 dotacións e 1 helicóptero) procederon a reter durante unha hora a un grupo das persoas que participaron na concentración e incluso a algún viandante que se achegou a saudalos.

As persoas foron identificadas anunciando unha sanción para o sindicato promotor, a CIG e outra para cada un dos participantes. Un feito sen precedentes ante unha protesta pacífica. Estamos ante unha actuación represiva cara a mocidade que pretende coartar o dereito a protestar pacificamente contra a explotación laboral e as leises que a amparan. Os gobernos que teñen medo dos traballadores e traballadoras son ditaduras.

A CIG presenta a convocatoria de Folga Xeral

2010-09-07T13:56:00.000-07:00

A CIG presentou esta mañá, na consellaría de Traballo e Benestar a convocatoria de folga xeral, que afectará a todas as actividades desempeñadas polos traballadores e traballadoras de empresas privadas e do sector público, con vínculo funcionarial, estatutario ou laboral en Galiza. A folga comezará ás 0:00 horas do día 29 de setembro e rematará ás 24:00 horas. Con esta convocatoria a central sindical pretende dar unha resposta contundente e frear as agresións das que está sendo obxecto a maioría social, a clase traballadora, e que van máis alá da reforma laboral, e abrir un debate social sobre cara que modelo de organización económica, social e política debemos camiñar.

“Estamos diante dunha convocatoria de folga xeral que transcende o que é estritamente a reforma laboral que está hoxe a debate”, explicaba o secretario xeral da CIG, Suso Seixo, tras facer entrega no rexistro da consellaría de Traballo, da convocatoria de folga xeral.

Para a CIG, estamos ante un debate de modelo de organización social e económica e, “ou camiñamos cara formas de organización social máis xustas, solidarias e democráticas ou, se non conseguimos parar estas reformas, vaise reforzar aínda máis este modelo inxusto e antidemocrático, na medida en que se concentra máis poder económico e político en poucas mans e, finalmente, quen termina decidindo as políticas económicas e sociais son o FMI e outras institucións sobre as que non hai nin control popular, nin control institucional”.

Por iso, o secretario xeral da CIG alertou da gravidade que ten que se centre todo o debate sobre a crise económica e a saída da mesma arredor da reforma laboral “cando nada teñen que ver as supostas rixideces do mercado laboral e o custo de despedimento, nin mesmo a estrutura da negociación colectiva” nin coas causas nin coa súa solución.

De feito, denunciou que se está a utilizar a crise como “desculpa” para recortar dereitos laborais e “detraer recursos dos traballadores e mesmo do erario público, para a patronal”, afondando moito máis “neste modelo neoliberal para que aqueles que provocaron a crise manteñan as súas ganancias”.

A reforma laboral

Respecto da reforma laboral, que será ratificada o próximo día 9 de setembro no Congreso dos Deputados, logo de introducirse as modificacións aprobadas no Senado, o secretario xeral lembrou que neste trámite “se empeorou o Real Decreto de reforma laboral presentado inicialmente”, o que implica “confirmar as nosas peores expectativas”, dixo.

Así salientou, entre as medidas que contempla a reforma, o abaratamento do despedimento, a ampliación das causas de despedimento por causas obxectivas; a ampliación do contrato de formación até os 24 anos que “é facilitar man de obra barata aos empresarios”; a privatización da intermediación no mercado laboral, dando entrada ás axencias privadas de contratación con ánimo de lucro abríndoas a sectores que até o de agora lles estaban vetados, mesmo os de alto risco como o da construción, ou na administración pública...

As reformas pendentes

Para a CIG, con esta folga xeral, tamén se queren denunciar e frear reformas pendentes, “que xa están enriba da mesa” como a das pensións, coa que se pretende, entre outras cousas, ampliar a idade de xubilación, ou a da negociación colectiva. Reformas que tamén se tratan de introducir utilizando como pretexto a crise económica e que “tampouco teñen nada que ver con ela”, asegurou.

Coa reforma da negociación colectiva, o secretario xeral da CIG advertiu que se busca unha maior centralización, o que, na práctica “vai supor maior burocratizacion, illar ás/aos traballadoras/es do debate a medio e longo prazo e deixar o camiño aberto para precarizar aínda máis as súas condicións laborais e o mercado laboral no seu conxunto”.

Xornada de folga

Na convocatoria presentada pola CIG, que dará comezo ás 00:00 horas do 29 de setembro até as 24:00 horas dese mesmo día, estabelécense algunhas excepcións referidas ás empresas, administracións e organismos que teñan varias quendas de traballo. Nese caso o comezo da folga realizarase na primeira quenda, aínda que comece antes das 00:00 horas e finalizará unha vez rematada a última quenda, aínda que vaia máis alá das 24:00 horas.

Alén diso, e para garantir a cobertura informativa do paro, nas empresas xornalísticas e medios de comunicación, a folga convocada terá lugar no período comprendido entre as 07:00 horas do día 28 de setembro e as 24:00 horas do día 29 de setembro, correspondendo aos traballadores /as de cada centro de traballo a determinación do horario de folga do período de referencia.

Á CONSELLARÍA DE TRABALLO E BENESTAR DA XUNTA DE GALIZA

C/C: Consellaría de Facenda, Delegación do Goberno de España en Galiza, Federación Galega de Municipios e Provincias, Confederación de Empresarios de Galicia

Asunto: Convocatoria de folga xeral

XESÚS ELADIO SEIXO FERNÁNDEZ, en representación do sindicato CONFEDERACIÓN INTERSINDICAL GALEGA (CIG), do cal é secretario xeral, con domicilio para efectos de notificacións na rúa Miguel Ferro Caaveiro, 10; 15707 Santiago de Compostela; EXPÓN:

I. A Executiva Confederal da CIG decidiu convocar unha FOLGA XERAL que afectará a todas as actividades desempeñadas polos traballadores e traballadoras de empresas privadas e polos empregados e empregadas do sector público, con vínculo funcionarial, estatutario ou laboral, no ámbito territorial da Comunidade Autónoma de Galiza.

II. Mediante este escrito, e consoante ao disposto nos artigos 3 e 4 do Real Decreto-lei 17/1977, do 4 de marzo, a CIG procede a comunicar formalmente a decisión adoptada, coa advertencia de que a folga afecta a empresas, administracións e organismos que prestan actividades e servizos esenciais para a comunidade.

III. A folga convocada terá lugar o día 29 de setembro de 2010, comezando ás 00:00 horas e rematando ás 24:00 horas, coas salvidades que se indican a continuación:

– Nas empresas, administracións e organismos que teñan varias quendas de traballo, o comezo da folga xeral realizarase na primeira quenda, aínda que comece antes das 00:00 horas do día 29 de setembro de 2010, e finalizará unha vez rematada a última quenda, aínda que se prolongue máis alá das 24:00 horas do día de referencia.

– Para garantir a cobertura informativa do paro, nas empresas do sector do xornalismo e medios de comunicación, a folga convocada terá lugar no período comprendido entre as 07:00 horas do día 28 de setembro de 2010 e as 24:00 horas do día 29 de setembro de 2010, correspondendo aos traballadores e traballadoras de cada centro de traballo a determinación do horario de folga dentro do período de referencia.

IV. O obxectivo da folga xeral é mostrar o rexeitamento da clase traballadora galega á reforma laboral aprobada polo Goberno español mediante o Real Decreto-lei 10/2010, do 16 de xuño, de medidas urxentes para a reforma do mercado de traballo, ben como ao seu desenvolvemento e modificacións na tramitación parlamentaria do correspondente proxecto de lei; tanto pola forma en que a reforma se xestou como polos seus contidos claramente regresivos.

a) Crise estrutural do diálogo social:

O proceso de “diálogo social” que se desenvolveu para abordar a reforma tiña un obxectivo marcado previamente: recortar os dereitos laborais. Os documentos públicos do Goberno (o primeiro, do 5 de febreiro) así o confirmaban. Cando o presidente Sr. Rodríguez Zapatero dixo que “faría os axustes custe o que custe” e que “na reforma laboral se tocarían aspectos esenciais” era claro que a grande beneficiada sería a patronal. Desde esa realidade o deseño do “diálogo social” que se realizou supuxo un factor de control social e desmobilización evidente. Nese “diálogo social” preténdese dar a falsa imaxe de que as responsabilidades son compartidas, cando en realidade a xestión das consecuencias da crise se decide de xeito acordado entre os gobernos, a patronal e os poderes financeiros.

b) Proceso sumarísimo contra os dereitos laborais:

O Goberno español decidiu, unha vez máis, impor unha reforma laboral vía Real Decreto-lei, un mecanismo reservado para situacións límite ou urxentes. Ese procedemento utilízase para evitar o debate, a participación e a confrontación social. Tras dar por pechada a mesa de “diálogo social”, o Goberno buscou o acordo coas posicións máis reaccionarias, empeorou sensibelmente o texto inicial e asegurou, aos que permitiron que o Real Decreto-lei se tramite como proxecto de lei, que nese trámite aínda poden recortarse máis dereitos. No Parlamento, e coa colaboración desas forzas políticas, abriuse un “mercado persa” de transaccións que ten por obxecto único lesionar gravemente os dereitos laborais. A decisión de pechar o debate en pleno período do verán (habilitando xullo e agosto para levar a efecto ese atropelo) é unha mostra máis de como se xoga cos dereitos da xente.

c) Lexislación básica estatal:

En Galiza aplícase a lexislación laboral decidida no Estado español, o que supón a aplicación dun modelo de reforma permanente, na que, como se mencionou, os recortes de dereitos conxúganse coa ameaza de recorte das nosas posibilidades de negociación colectiva. Este modelo é moi prexudicial para a clase traballadora.

d) Aspectos regresivos máis salientábeis:

– As medidas aprobadas supoñen facilitar e abaratar o despedimento para todos os traballadores e traballadoras que teñen un contrato indefinido. Ademais, apróbase a subvención pública para parte destes despedimentos.

– A reforma ataca a esencia da negociación colectiva, ao facilitar que as empresas queden exentas da aplicación dos convenios colectivos, en especial no que fai referencia ao salario. Tamén se avanza na posibilidade de que os empresarios, sen acordo coa representación sindical, realicen modificacións substanciais das condicións de traballo.

– A reforma abre novas portas ao negocio empresarial coa intermediación no emprego. Para iso, legalízanse as axencias privadas de colocación con ánimo de lucro, e elimínanse a práctica totalidade das restricións á actuación das empresas de traballo temporal (ETTs), co aumento do risco de sufrir un accidente laboral que iso leva.

– Ao longo do proceso de negociación da reforma laboral, realizado en segredo, saíu a relucir o compromiso da patronal, CCOO e UGT de acordaren unha nova estrutura da negociación colectiva. Non é a primeira vez que se realiza este intento de centralizar a negociación colectiva, para eliminar ou reducir á súa mínima expresión os convenios sectoriais territoriais. A CIG considera que sería moi grave que se negase ou limitase aos traballadores e traballadoras de Galiza o dereito a decidir que e onde negociar. Implicaría, ademais, afastar e dificultar a participación na negociación colectiva da gran maioría dos traballadores e traballadoras, pertencentes á pequena empresa, co retroceso nas súas condicións laborais que iso suporía co tempo.

– Do mesmo xeito que nas reformas anteriores, a temporalidade en fraude, consentida pola nula vontade das administracións laborais en perseguila, volveuse utilizar como escusa para atacar os elementos de protección da relación laboral.

– Son varias as falsidades utilizadas para xustificar a reforma. A primeira é que se creará emprego. Non é verdade; a reforma non suporá nin un emprego novo. Ao contrario, servirá para destruír máis postos de traballo en época de crise. A segunda mentira é que despedir é difícil e caro. En realidade, o despedimento é libre, e non debe ser moi caro vendo a facilidade coa que se destruíron moitos máis empregos que en ningún outro sitio de Europa. Estas e outras falsidades foron estendidas polos denominados “expertos”, un colectivo moi ben identificado ao que lle é imposíbel agochar a súa ligazón estreita co mundo empresarial e financeiro.

– O obxectivo real dos recortes é mellorar a conta de resultados das empresas, dando moito máis poder ao empresario. É inaceptábel que se fale de “mudanza do demodelo produtivo” cando a aposta da reforma se concreta en aumentar a precariedade.

V. En canto ás xestións realizadas para resolver as diferenzas, debemos indicar, con carácter xeral, que a CIG, na súa condición de sindicato máis representativo a nivel da Comunidade Autónoma de Galiza, participa nos órganos de participación institucional da Administración Xeral do Estado, achegando a súa lexítima visión nacionalista e de clase sobre o modelo de relacións laborais e protección social. Igualmente, todos os anos elabora e formula propostas no marco das consultas para a elaboración dos Planos Estatais de Acción para o Emprego que desde 1997 ten a obriga de presentar o Goberno español á Comisión Europea, con escasa receptividade por parte do Goberno.

De forma específica, sobre as causas que motivan a folga, debemos manifestar que o Goberno español excluíu a CIG –ben como os outros sindicatos máis representativos a nivel de comunidade autónoma– de calquera eventual proceso de negociación ou de consultas previo á aprobación do Real Decreto-lei 10/2010, do 16 de xuño. Non obstante, e aínda sendo conscientes da nula vontade de diálogo por parte do Goberno, o pasado día 21 de xullo de 2010 os sindicatos CIG e ELA mantiveron unha xuntanza no Congreso dos Deputados con deputados do BNG, Nafarroa Bai, CiU, PNV e PSOE (non asistiron CC, PP e UpyD), na cal lles fixeron entrega dunha declaración conxunta na cal manifestaban a súa preocupación polo contido antisocial da reforma e solicitaban o rexeitamento dos respectivos grupos parlamentarios ás medidas contidas no Real Decreto-lei 10/2010, do 16 de xuño, con ocasión da tramitación da reforma laboral en sede parlamentaria.

VI. O Comité de Folga estará formado polas seguintes persoas:

• Xesús E. Seixo Fernández

• M. Anxo Garcia Torres

• Manuel Currás Meira

• Margarida Corral Sánchez

• Elvira Patiño Ogea

• Antonio López Rivera

• Ramiro Oubiña Parracho

• Antolín Alcántara Álvarez

• Xosé Francisco Miranda Vigo

• Francisco X. Cartelle Pérez

• Laura Bugallo Sánchez

• Anxo Pérez Carballo

Este Comité de Folga delega expresamente nas estruturas sindicais e nos representantes dos traballadores e traballadoras que en cada caso se designen para os efectos de negociar servizos mínimos e outras cuestións operativas relacionadas co desenvolvemento da folga.

Para os efectos de constancia e comunicación preceptiva, asina a presente en representación da organización sindical convocante, en Santiago de Compostela, a seis de setembro de dous mil e dez.

O secretario xeral da CIG,

Xesús E. Seixo Fernández

21 meses despois

2010-09-06T03:07:00.000-07:00

Táboas Salariais 2009

A reunión da mesa negociadora viu precedida pola reunión da Comisión Paritaria na que ACCE-CCOO-UGT, aprobaron as táboas salariais do ano pasado (que tiñan que ser aprobadas en xaneiro de 2009, fai 20 meses) pero aínda quedan pendentes do visto bo da patronal.

Non pagaron os atrasos cando correspondían, agora continúan dándolle voltas ás táboas e aínda hai quen está contento e vende coma un logro que haberá táboas con 21 meses de retraso. Como di o refrán “cantos burros alimenta a fariña”.

“Negociación” do novo Convenio

En relación á negociación do Convenio o período de vacacións que se tomaron as empresas tampouco serviu para avanzar; a reunión do día 2 de setembro centrouse nos primeiros artigos do Convenio que falan de: “extensión”, “ámbito temporal” e “compensación, absorción e garantías”.

Sindicatos centralistas e patronal están de acordo en que non se podan negociar convenios de ámbito inferior, é dicir prohiben negociar convenios de empresa ou o convenio de ámbito galego. Non é lóxico impedir que se negocien acordos que melloren o convenio noutros ámbitos, está claro porque a patronal defende esta prohibición, pero CCOO e UGT deberían explicar o motivo.

Máis alá de prohibir negociar noutros marcos, o resto da mañá foi unha disertación sobre a duración do Convenio (con propostas de 2 a 10 anos “se era bo” dixeron algúns). É absurdo falar do que debería durar cando aínda non se avanzou en ningunha das cuestións de calado.

Cremos firmemente que é necesario mobilizar o sector para desbloquear a negociación e conseguir avances reais, o goberno prepara novas reformas, entre elas a da negociación colectiva, continuar alongando a negociación só prexudica aos traballadores/as do sector, como xa nos prexudicou a reforma laboral. Non é o momento de rirlle as grazas á patronal, o 29 de setembro temos folga xeral.

Comunicado n 10 Convenio Colectivo: 21 meses despois

2010-09-04T01:18:00.000-07:00

Táboas Salariais 2009

A reunión da mesa negociadora viu precedida pola reunión da Comisión Paritaria na que ACCE-CCOO-UGT, aprobaron as táboas salariais do ano pasado (que tiñan que ser aprobadas en xaneiro de 2009, fai 20 meses) pero aínda quedan pendentes do visto bo da patronal.

Non pagaron os atrasos cando correspondían, agora continúan dándolle voltas ás táboas e aínda hai quen está contento e vende coma un logro que haberá táboas con 21 meses de retraso. Como di o refrán “cantos burros alimenta a fariña”.

“Negociación” do novo Convenio

En relación á negociación do Convenio o período de vacacións que se tomaron as empresas tampouco serviu para avanzar; a reunión do día 2 de setembro centrouse nos primeiros artigos do Convenio que falan de: “extensión”, “ámbito temporal” e “compensación, absorción e garantías”.

Sindicatos centralistas e patronal están de acordo en que non se podan negociar convenios de ámbito inferior, é dicir prohiben negociar convenios de empresa ou o convenio de ámbito galego. Non é lóxico impedir que se negocien acordos que melloren o convenio noutros ámbitos, está claro porque a patronal defende esta prohibición, pero CCOO e UGT deberían explicar o motivo.

Máis alá de prohibir negociar noutros marcos, o resto da mañá foi unha disertación sobre a duración do Convenio (con propostas de 2 a 10 anos “se era bo” dixeron algúns). É absurdo falar do que debería durar cando aínda non se avanzou en ningunha das cuestións de calado.

Cremos firmemente que é necesario mobilizar o sector para desbloquear a negociación e conseguir avances reais, o goberno prepara novas reformas, entre elas a da negociación colectiva, continuar alongando a negociación só prexudica aos traballadores/as do sector, como xa nos prexudicou a reforma laboral. Non é o momento de rirlle as grazas á patronal, o 29 de setembro temos folga xeral.

Fin de obra do servizo de CAC de Tele2

2010-08-11T04:07:00.000-07:00

Tal e como xa viñeramos anunciando dende febreiro finalmente a dirección da empresa comunicou o remate da campaña de CAC de Tele2 en Bosch.

A cantidade total de persoas afectadas é de 57, 56 de plantilla de Bosch e unha persoa de ETT. Dentro do persoal afectado a empresa reubicará a un total de 40 persoas nos proxectos de Provisión para Vodafone e Vueling.

Na primeira reunión anunciaron que serían 20 as persoas despedidas, dende o primero momento dende a CIG defendimos a reubicación de todo o persoal. Finalmente hoxe comunicaron que serán 17 as persoas despedidas e que esta cifra é inamovible.

Nos non asumimos nin un só despedimento, conscientes ademais de que Vodafone non remata de ofrecer este servizo á clientela, pero a través doutra empresa de telemárketing en Valladolid. Por que Bosch/Vodafone despedirán a 17 persoas en Galiza levándose o traballo para unha empresa que recibe subvencións da Junta de Castilla León.

Propuxemos tamén que naqueles casos nos que o persoal non quixera a reubicación eses postos se cubrisen coas persoas afectadas pola finalización. Sobre este punto a empresa informou que o listado de finalizacións de obra era inamovible e que si alguén rexeita a reubicación incrementarase o número de despedimentos. Como di o refrán queren “aprovechar que el Pisuerga pasa por Valladolid” para desfacerse do persoal.

Tamén queremos recordar a todas as persoas afectadas que non asinen ningunha documentación sen habela lido toda e con atención, especialmente as cláusulas en novos contratos, e en caso de dúbidas poñer “recibín e non conforme” coa data e a hora na que se asina, ademais de solicitar unha copia de todo o que se asine.

Para calquera dúbida podedes poñervos en contacto con nós a través do correo cigbosch@gmail.com ou dirixirvos a calquera dos nosos delgados/as

A patronal aplaude aos gobernos central e autonómico e suspende a negociación.

2010-08-02T05:06:00.000-07:00

Reunida a mesa negociadora do Convenio Colectitivo Estatal de Contact Center (telemárketing) as empresas anunciaron que:

Queren aplicar a contrarreforma laboral en todos os apartados e polo tanto piden ampliar no Convenio os prazos máximos previstos para os contratos por Obra ou Servizo.
Propoñen deixar a negociación ata o mes de setembro. Daquelas nas reunións leríamos artigo por artigo para mirar que propón cada quen.
Un dos puntos que queren modificar no texto do Convenio é o relativo ás pausas PVD, para eliminar os efectos da recente sentenza do Tribunal Supremo que recoñece unha pausa por hora traballada.

Todos e todas deberemos facer fronte a unha contrarreforma laboral que nos afecta gravemente: abarata e facilita os despedimentos; subvenciona con diñeiro público os despedimentos improcedentes (é dicir inxustos!!); e digan o que digan non pon coto á temporalidade. Por outra banda amplia as posiblidades para que as empresas se descolguen e deixen de aplicar os Convenios e ademais lles facilita un amplo abano de medidas por causas técnicas e organizativas.

Si a estas medidas do goberno central, lle sumamos a complicidade da Consellería de Traballo, temos un difícil panorama no sector. No caso de Sykes a Consellería do PP aprobou como xustificación dun ERE´s (é dicir despedir ao persoal indefinido) o remate dun contrato mercantil e a deslocalización dos servizos cara a outro país.

O 29 de setembro a CIG convocará unha FOLGA XERAL na que estamos chamados a participar. No noso sector, xa de por si precario, as últimas medidas gobernamentais precarizan as nosas condicións e fortalecen á empresas que non agochan a súa satisfacción e prepotencia.

Pero mais ala da FOLGA XERAL en telemárketing é precisa unha resposta inmediata que trataremos de acordar co resto das forzas sindicais.

A patronal suspende a reunión do Convenio á espera da reforma laboral

2010-06-16T14:52:00.000-07:00

A patronal de telemárketing anunciou hoxe que quere suspender a reunión da mesa negociadora do Convenio Colectivo prevista para o día 18 de xuño, á espera de que o Goberno do PSOE aprobe a reforma laboral.

As empresas de telemárketing queren agardar a coñecer os recortes de dereitos laborais (maior flexibilidade interna, abaratamento e facilidade dos despedimentos, modificación dos modelos de contratación, posibilidade de que as empresas deixen de aplicar o convenio alegando mala situación económica, etc), para trasladalos ao noso Convenio.

Pola nosa parte solicitamos que se manteña a reunión, non é xusto que as empresas pretendan hipotecar a negociación do Convenio Colectivo, en definitiva as nosas condicións laborais, á aprobación por parte do Goberno dunha reforma laboral lesiva para os nosos intereses.

O vindeiro día 17 de xuño a CIG estará na rúa con manifestacións contra a reforma laboral, unha reforma que como vemos, as avarentas empresas de telemárketing pretenden ser as primeiras en aplicar.

O 17 de xuño, maniféstate coa CIG,

porque esta contrareforma nos afecta directamente

Vigo: Vía Norte ás 20.00 horas.

A Coruña: Praza da Palloza ás 20.00 horas.

Santiago de Compostela: Praza Roxa ás 20.30 horas.

Pontevedra: Praza da Ferrería ás 20.30 horas.

Ferrol: Avenida de Esteiro (local da CIG) ás 20.00 horas.

Lugo: Parque de FRIGSA ás 20.00 horas.

Ourense: Pavillón dos Remedios ás 20.00 horas.

Vilagarcía de Arousa: Casa do Mar (Avda. da Mariña) ás 20.30 horas.

Outra sentenza xudicial gañada, esta vez por redución de xornada para coidado familiar

2010-06-15T15:04:00.000-07:00

Si a semana pasada informábamos dunha nova sentenza xudicial gañada, relativa ao dereito a librar días completos como compensación das horas extras por exceso de xornada, hoxe chegounos outra gañada.

A empresa comunicou o cambio da quenda de maña para a de tarde a unha compañeira.

Aos poucos días a traballadora solicitou unha redución de xornada por coidado de familiar e seguir na quenda da maña. Bosch denegouna, como é habitual ante calquera petición. A compañeira, afiliada da CIG, presentou a correspondente demanda para defender o seu dereito a conciliar a vida laboral e familiar.

Agora o Xulgado do Social nº1 ditou sentenza, en base a que:

“Dentro da redución de xornada prevista polo artigo 37.5 e 6 do Estatuto dos Traballadores/as, entra o cambio de quenda ou a adscrición fixa a unha quenda, sen que a dificultade ou inconveniencia para a empresa sexan equiparables a imposibilidade.”

Polo que a sentenza, que é firme e sen recurso, declara o dereito da traballadora á concreción horaria para o coidado directo do seu familiar.

Bosch estase gañando unha fama merecida, todo o día litigando nos xulgados por cuestións que en calquera empresa normal resólvense co dialogo e a negociación.

Tristemente se isto segue así continuaremos informando de novas sentenzas.

Exceso de xornada, o xulgado danos a razón

2010-06-11T03:16:00.000-07:00

Como todos e todas sabedes os horarios que Bosch impón unilateralmente levan a un exceso de xornada como aconteceu no 2008 e repetiuse no 2009.

Bosch ten como criterio impoñer despois a libranza compensatoria, sen contemplar a posibilidade de dar días completos ou retribuír as horas extras realizadas.

O pasado 3 de xuño o xulgado do social nº1 de Vigo ditou sentenza que textualmente di:

“As horas extras foron realizadas por iniciativa da empresa e si deben compensarse, como debe facerse, elo debe ser liberando da xornada laboral que corresponde realizar á traballadores e non impoñéndoselle unha nova obriga coma é acudir a traballar todos os días como convén á empresa pero só unhas horas como lle conveña á empresa, co que o exceso de xornada non se traduce na libranza de día algún.”

Ante isto a sentenza estimou a demanda presentada pola nosa delegada Paola de HD e obrigou a Bosch a que abone a cantidade correspondente como horas extras ou lle conceda días completos.

Esta nova sentenza, engádese as gañadas no 2010: unha do Tribunal Superior que considerou improcedente o despido do persoal de ETT alegando baixada do volume de traballo sen demostralo; e outra na que consideraron que un despedimento foi improcedente ao considerar que malia estar dentro da mesma obra de Orange, recepción e emisión son servizos distintos.

Agardamos que en cumprimento da actual sentenza, Bosch non impoña a compensacións das horas extras e que por outra parte se negocie un acordo de horarios que evite o permanente exceso de xornada.

Por lei as horas extras son voluntarias, impoñendo uns horarios irregulares Bosch está conseguindo que sexan obrigatorias, algo que tampouco estamos dispostos a admitir.

A CIG convoca manifestacións o 17 de xuño

2010-06-10T05:47:00.001-07:00

Milleiros de persoas perderon o seu posto de traballo dende o inicio da crise grazas as altas taxas de temporalidade, ERE’s e despedimentos individuais e colectivos; agora está en marcha unha reforma laboral para facilitar aínda máis os despedimentos; está anunciada unha reforma das pensións para outubro co fin de alongar a vida laboral; están en marcha recortes nos servizos públicos e aos pensionistas; anunciouse o incremento dos impostos indirectos (mantendo artificialmente baixos os impostos das rendas máis altas); hai un proceso de privatización e precarización dos servizos públicos (hospitais, ensino ou caixas de aforros); continúa a transferencia de renda e recursos públicos ás empresas (multimillonarios rescates bancarios; subvencións públicas ás empresas; pago público de infraestruturas que só interesan ás grandes empresas, etc.).

En definitiva, estamos ante unha crise que os mercados (é dicir, a dereita económica, política e empresarial) queren que paguemos os e as que vivimos do traballo.

Xa pagamos en tempos de bonanza: no laboral, pola implantación dun sistema de organización do traballo en precario (temporalidade, ritmos de traballo asfixiantes, longas xornadas laborais, redución dos salarios) e no económico, porque fomos as vítimas da especulación sobre os bens básicos (alimentos, vivenda, subministro de electricidade, gas e luz, etc.) que xerou a crise.

Dende o inicio da crise vimos reclamando un cambio de modelo económico que habilitase unha saída social. Pola contra, utilizan a crise como escusa para implantar un modelo económico e social que a maioría democrática da cidadanía rexeita.

Por todo isto, a CIG convocamos mobilizacións de protesta e propuxemos a convocatoria dunha FOLGA XERAL en varias ocasións dende o inicio da crise. Entendemos que é preciso pasar a ofensiva, para que non utilicen a crise para implantar un réxime económico e político lesivo para os intereses da maioría.

O vindeiro 17 de xuño os traballadores e traballadoras de toda Galiza estamos chamados a manifestarnos coa CIG.

Vigo, 20:00, Vía Norte
A Coruña, 20:00, Praza da Palloza
Santiago, 20:30, Praza Roxa
Pontevedra, 20:30, Praza de Ferrería
Ferrol, 20:00, Avda. de Esteiro
Lugo, 20:00, Parque de Frigsa
Ourense, 20:00, Pavillón dos Remedios
Vilagarcía de Arousa, 20:30, Casa do Mar

Convenio: Houston, temos dous problemas!!!

2010-05-27T15:56:00.000-07:00

Na última reunión da mesa negociadora quedou claro que a patronal non vai mover peza á espera de dous acontecementos:

Por unha parte, tal como anunciaron, as empresas queren agardar a reforma laboral que neste momento negocian de xeito opaco e sen que coñezamos do que están falando CCOO-UGT e a CEOE en Madrid, ou incluso a que o Goberno central poña en marcha; unha reforma unilateral como piden Organismos totalmente desprestixiados como o FMI (Fondo Monetario Internacional). Outras reformas abarataron os despedimentos e ampliaron a temporalidade entre outras cuestións; a patronal sabe que nese terreo leva as de gañar.

Por outra banda, varias patronais, en outros convenios abertos, xa anunciaron que queren baixar os salarios ao amparo do decretazo do Goberno para os empregados e empregadas públicos. Se o Goberno rebaixa os salarios ao persoal público eles tamén queren rebaixalos para o persoal das empresas privadas.

A reforma laboral en marcha e o recorte das pensións e do salario dos empregados/as públicos afectan á negociación do noso Convenio.

Dende a CIG pensamos que ante a situación creada por ambas cuestións e ante o incremento do paro e contra quen quere facer pagar a crise aos que non somos responsables da mesma, todos os sindicatos deberíamos poñernos de acordo para convocar unha Folga Xeral que afecte en todos os sectores en todo o Estado.

Dificilmente os traballadores e traballadoras de Telemárketing poderemos conseguir un bo convenio que inclúa unha suba salarial digna, se non hai unha resposta colectiva fronte aos recortes, axustes e a reforma laboral.

Prestación anual 2010 por filla/o menor a cargo

2010-05-27T15:51:00.000-07:00

Persoas beneficiarias:

Persoas que teñan ao seu cargo menores de 3 anos na data de 1 de xaneiro de 2010 (con data de nacemento entre o 2-1-2007 e o 1-1-2010, incluídos) e que, por razón dos ingresos obtidos durante o ano 2008 nin elas nin ningún dos/as membros da unidade familiar estivesen obrigados a presentar a declaración do IRPF.
No caso de crianzas adoptadas ou acollidas entre o 31 de decembro de 2008 e o 31 de decembro de 2009, a prestación poderase conceder durante os tres anos posteriores á data da inscrición no Rexistro Civil ou, cando esta non sexa necesaria, a partir da data da resolución xudicial ou administrativa que a declare.
Nos supostos de nulidade, separación ou divorcio, o pai/nai que teña a custodia dos fillos/as.
Persoas estranxeiras que residan en Galiza, sempre que cumpran as condicións da Lei sobre dereitos e liberdades dos estranxeiros/as e a súa integración social e os requisitos establecidos na presente norma, e tiveran a condición de contribuíntes.

»Quedan excluídas:

As unidades familiares nas cales os seus ingresos considerados de forma individual ou conxunta, segundo a opción de tributación elixida, superasen no exercicio 2008 os 22.000 €, sumadas a parte xeral e especial da declaración do IRPF.
Pais e nais privadas da patria potestade ou se a tutela ou garda fora asumida por unha institución pública.

■ Requisitos:

Residencia habitual en Galiza.
Que na data da solicitude as/os nenas/os convivan coa persoa solicitante.

■ Contía da axuda:

Pagamento único de 360 € por cada menor que a persoa solicitante teña ao seu cargo.

■ Documentación:

1.-Novas solicitudes:

- Anexo I.

- Fotocopia do libro de familia ou certificación literal do Rexistro Civil do nacemento de cada crianza.

- Certificado de empadroamento conxunto de toda a unidade familiar.

- Copia da sentenza de nulidade, separación ou divorcio e do convenio regulador, de ser o caso.

- Nos supostos de adopción ou tutela, copia do auto xudicial de adopción ou da resolución xudicial.

- Fotocopia da folla da cartilla de aforros na que conste o número de conta onde ingresar a axuda e conste como titular a persoa solicitante. No caso de non dispor de cartilla poderase presentar unha certificación bancaria.

- Declaración conxunta de todas as axudas solicitadas ou concedidas por este mesmo fin (anexo II).

A presentación da solicitude comportará:

-Autorización para consulta de dados de documentación nacional de identidade de solicitante e cónxuxe.

-Autorización para consulta dados de carácter tributario. Neste caso será precisa a autorización de cónxuxe por medio de sinatura de anexo II.

2.-Solicitudes para persoas anteriormente beneficiarias:

Para persoas que recibiron esta axuda no ano 2009, e non teñan solicitadas nin concedidas outras axudas por este mesmo fin, so terán que presentar o anexo I, sempre e cando non se modificaran as circunstancias persoais, xurídicas e económicas determinantes do dereito á prestación. Neste caso poderá obterse a solicitude debidamente cuberta no enderezo: www.xunta.es/aplicacions/pfc.

• Aquelas solicitudes que se presenten eliminando delas algún dos proxenitores que figuraba o ano anterior, deberán estar acompañadas da xustificación documental correspondente: Copia da sentenza de separación ou nulidade, certificado de empadroamento conxunto da unidade familiar, certificado de defunción.

■ Lugar de presentación:

-Vía escrita: nos rexistros dos departamentos territoriais da Consellería de Traballo e Benestar.

-Vía telemática: cando se dispoña de certificado dixital, poderá accederse a esta vía a través da aplicación: www.xunta.es/aplicacions/pfc.

Prazo de presentación:

40 días naturais contados a partir do 11 de maio de 2010.

Dirixídevos ás vosas delegadas e delegados da CIG para facilitarvos os formularios de solicitude e anexos que deberedes cubrir se estades interesados/as en solicitar esta prestación.

Noraboa ás compañeiras de CIG en Unísono CRM Vigo

2010-05-18T23:52:00.000-07:00

Onte houbo eleccións sindicais en Unísono Vigo, as nosas compañeiras da Sección Sindical da CIG en Unísono gañaron as eleccións, con 222 votos e 9 delegados/as convertese na primeira forza na empresa de telemarketing Unísono CRM en Vigo.

A candidatura da CIG con 222 votos obtivo 9 delegados/as, CGT (ata estas eleccións primeira forza) sumou 156 votos e 6 delegados, CCOO tivo 110 votos e 5 representantes e por último a UGT tivo 77 votos e 3 delegadas.

A CIG entrou en Unísono nas primeiras eleccións sindicais fai catro anos con 49 votos longrando 2 delegadas de 9. Posteriormente en maio de 2007 houbo novas eleccións por ampliación do Comité en 4 delegadas, conseguiu a CIG 53 votos e 1 delegada, polo que o resultado actual é un salto cualitativo e cuantitativo tanto en número de votos como en representación.

Este resultado é un espaldarazo ao traballo desenvolvido pola CIG en Unísono e no sector de telemárketing onde a CIG medrou ata o de agora en todos os procesos electorais. En Vigo xa somos 21 delegados/as entre Bosch e Unísono.

Varapau a política laboral de Bosch: Despedimentos de ETT, sentenzas e acordos

2010-05-14T06:32:00.000-07:00

Bosch utiliza as ETT´s para non cumprir o Convenio en aspectos esenciais abaratando e facilitando os despedimentos. Agora o Tribunal Superior de Xustiza de Galicia acaba de darnos a razón, xusto no momento en que estanse celebrando novos xuízos por despedimentos de ETT.

A empresa despediu en numerosas ocasións a persoal de ETT alegando “fin de obra” ou “baixada de traballo nas campañas”. Entendían que como o persoal non estaba contratado directamente por Bosch non tiñan que demostrar nada.

A sentenza do TSXG ratificou que os despedimentos de persoal de Ader eran improcedentes, toda vez que non se demostraron os feitos alegados.

Pero estes mesmos días estamos chegando a acordos coas distintas ETT, recoñecendo a improcedencia dos últimos despedimentos e pactando a correspondente indemnización. Conseguimos acordos de indemnizacións de ata 4.300 e 7.000 euros para ETT despedidas. Neste senso insistirlle ao persoal que non debe dar por bo ningún despido.

Entendemos que a sentenza do máximo Tribunal galego debería facer que Bosch reconsidere a súa política de despedimentos de ETT. Pero moito nos tememos que xa este buscando un subterfuxio legal engadindo cláusulas nos contratos de traballo que deixarían novamente ao persoal totalmente indefenso. Nese sentido a nosa recomendación ao persoal é que non se asinen cláusulas ligadas a obxectivos.

Convenio telemárketing: reducir custes a costa da saúde

2010-05-10T00:03:00.000-07:00

Na reunión do 7 de maio abordamos todo o relativo a Saúde Laboral; pasamos a relatarvos as distintas posicións sobre as cuestións faladas.

Non podemos considerar a saúde laboral unha cuestión menor, nomeadamente polos riscos psicosociais do noso traballo que desembocan nun gran número de baixas por enfermidades (estrés, depresión, ansiedade, etc.). No telemárketing non caemos do andamio, pero estamos expostas/os a unha gran carga mental, tanto pola atención á clientela como polos ritmos de traballo e as precarias condicións laborais.

Patronal

Queren especificar o número de pausas PVD para cada tipo de xornada; propoñen rebaixar as pausas PVD a razón de 6 por cada 8 horas de traballo. Din que non comparten a sentenza que perderon na Audiencia Nacional, que establece que o tempo de descanso é tempo de traballo efectivo, polo que por cada hora de traballo corresponde unha pausa.

CIG

1. A lexislación recomenda que as pausas PVD sexan de 10 minutos, mentres que o actual convenio establece pausas de 5 minutos.

Dende a CIG defendemos a ampliación das pausas a 7 minutos. Loxicamente defendemos manter unha pausa PVD por hora traballada. As pausas teñen como fin a protección da nosa saúde, polo que non cabe a posición da patronal pretendendo recortar custes a costa da nosa saúde.

2. Establecer que o tempo entre chamadas non poda ser inferior a 50 segundos, tanto para emisión como para recepción.

3. Que a representación dos traballadores e traballadoras poda rexeitar a Mutua elixida pola empresa, xa que temos detectado numerosos abusos por parte dalgunhas mutuas.

4. Implantar a obriga por parte das empresas de subscribir unha póliza de seguros de accidentes (tanto laboral como común), durante as 24 horas do día, que cubra os riscos de morte, invalidez permanente absoluta ou total, así como a gran invalidez, por unha contía de 20.000 euros.

A reunión non deu máis de si, xa que a patronal non deu contestación ás reivindicacións sindicais.

A vindeira será o 21 de maio na que toca Igualdade, Protección da maternidade e Formación.

Axudas Xunta de Galicia á conciliación da vida laboral e familiar

2010-05-04T03:56:00.000-07:00

O Diario Oficial de Galicia fai publica a resolución do 23 de abril de 2010, da Secretaría Xeral da Igualdade, pola que se regulan as bases para a concesión das axudas á conciliación da vida familiar e laboral como medida de fomento da corresponsabilidade para os traballadores que se acollan á redución da súa xornada de traballo. As solicitudes poderán presentarse ata o 31 de agosto de 2010.

Podes ver aquí un resumo.

A patronal ponse caprichosa

2010-04-14T05:30:00.000-07:00

Hoxe tivo lugar unha nova reunión da Mesa Negociadora do Convenio Colectivo. Pasamos a relatarvos as distintas cuestións faladas, as nosas reivindicacións e a contestación da patronal a cada unha delas.

Malia as sentenzas ao noso favor a patronal non quere pagar

Dado que as sentenzas do Tribunal Supremo noutros sectores recoñecen que o IPC previsto no ano 2009 era o 2%, pedimos ás empresas de telemárketing que paguen dunha vez, pero a patronal di que agardarán ata que o TS conteste ao seu recurso.

Contratación: Máis temporalidade e poder despedir aos indefinidos.

CIG: defendemos que o contrato tipo debe ser indefinido, deixando os temporais para a casuística concreta como no resto de sectores (cobertura de baixas, novas campañas de reducida duración, etc).

Os traballadores e traballadoras non podemos caer na trampa de defender unha porcentaxe de indefinidos, o excepcional non deben ser os indefinidos, deben ser os temporais. Todos os postos de traballo deben ser fixos, deixando a temporalidade para os casos previstos na lei.

Apostamos por prohibir as ETT no sector, incorporando ao actual persoal ás empresas.

E queremos que se elimine o artigo 17 para que calquera despedimento colectivo conte coas garantías mínimas recollidas na lei con carácter xeral. O telemárketing non pode ser unha excepción na que se lles faciliten os despedimentos masivos. Así mesmo, consideramos imprescindible a subrogación en todos os casos.

Patronal: Defenden ampliar a 1 ano os contratos eventuais, e poder aplicar ao persoal indefinido o artigo 17, é dicir, poder despedir de xeito colectivo saltándose as garantías legais que implican os ERE (expedientes de regulación de emprego).

Carreira Profesional: A actual favorece ás empresas e non queren cambiala.

CIG: defendemos que incluamos un novo catálogo de postos que redefina as funcións e que se recollan dúas novas categorías:

Teleoperador/a de primeira: aos 2 anos de prestar servizo como teleoperador/a especialista, cun incremento salarial do 4%.

Xestor/a de primeira: aos 2 anos de prestar servizo como xestor/a, cun incremento salarial do 4%.

Ademais, pedimos que desapareza a Comisión de Carreira Profesional constituída pola patronal, CCOO e UGT, por non ser operativa.

Patronal: contestou que ata que non saiba a suba salarial definitiva do Convenio, non vai a entrar en negociación sobre cuestións que impliquen incremento de custes. Así mesmo queren manter a actual Comisión (claro a eles vaille ben).

V Congreso da nosa Federación: Laura entrou na Executiva Nacional

2010-04-13T03:20:00.000-07:00

O V Congreso da Federación da Banca da CIG estivo marcado pola crise e restruturación do sistema financeiro, nomeadamente das Caixas de Aforros e pola grave deslocalización do sector do telemarketing. A nosa compañeira Laura Pérez Figueroa entrou na Executiva Nacional.

O sábado 10 de marzo celebrouse na cidade de Ourense o V Congreso da Federación de Banca, Aforro, Seguros e Oficinas da CIG baixo o lema "O Valor do sindicato" co que se quixo contrapoñer os valores que representa o sindicalismo nacionalista e de clase fronte a quenes cuestionan a vixencia do sindicalismo.

Minuto de silencio

Ao inicio do acto gardouse un minuto de silencio en memoria do compañeiro Fernando Pol traballador da CIG que sempre colaborou estreitamente coa Federación e de Marcelino Gomez, historico da CIG en Caixavigo, delegado no Comité Provincial de Caixanova en Ourense que era compromisario para o propio Congreso.

A continuación, deu comezo o Congreso propiamente dito, e despois de cantar a Internacional, o secretario comarcal da CIG-Ourense, Etelvino Blanco, dirixiu unhas palabras de benvida ás e aos asistentes a este V Congreso.

Informe da Executiva e do Secretariado

Unha vez aprobado o Regulamento do Congreso por unanimidade, o secretario nacional saínte da Federación, Clodo Montero, deu lectura ao Informe da Executiva e Secretariado Nacional. No informe destacouse que a Federación segue a ter o seu núcleo central no sector financeiro, pero que hoxe organiza ao persoal de todo o sector administrativo privado, nomeadamente grazas ao medre dun 38% da afiliación nos últimos catro anos froito dunha maior atención aos distintos sectores. Este informe foi aprobado con 111 votos a favor e 3 abstencións.

A seguir, o Congreso aprobou tamén por unanimidade a proposta de Mesa Presidencial que quedou composta por Xosé Ramón González, Chelo Lago, Xosé Valcárcel, María Louro e Luis Sabuz.

Posteriormente Teresa Richard e Sefi Romero fixeron a presentación do Relatorio de Organización e as modificacións Estatutarias, que tamén foron aprobadas.

Delegacións convidadas

A sesión matinal pechouse coa intervención das delegacións convidadas, ELA (Óskar Rodríguez e Marce Murias) e LAB (Joxean Urkiola) de Euskalherria, a Comissao de Trabalhadores do BBVA de Portugal (Luis Filipe Pinto e Paulo Alves) e da AEBU (Leonardo Batalla), o sindicato de rama Uruguaio integrado na PIT-CNT. Neste senso a CIG foi convidada a participar nun cúmio sindical da Banca latinoamericana que terá lugar no mes de maio en Brasil.

Relatorio de acción sindical

Xa pola tarde Gladis Afonso e Clodo Montero foron os encargados de presentar o Relatorio de Acción Sindical, que incidiu na gravidade da crise do sector financeiro no Estado que levou a un rescate multimillonario por parte do goberno que estaría na orixe do déficit público; na defensa da lei de Caixas do Parlamento Galego, un instrumento de democratización das Caixas pero tamén de soberanía financeira e recuperación económica; no modelo de organización do traballo toiotista que se está implantando no sector financeiro; do produtivismo capitalista laboral; da grave situación que atravesa o sector de telemarketing; e da necesidade de avanzar na soberania laboral, no marco galego.

Posteriormente procedeuse a elección do Secretario Nacional, da Executiva Federal e dos/as representantes no Consello Confederal, presentandose candidaturas únicas de integración.

Clodo Montero foi reelixido Secretario con 104 votos a favor e 1 voto en branco.

A candidatura para o Consello Confederal integrada por Clodo Montero, Sefi Romero, Gladis Afonso e Paco Diéguez foi elixida con 105 votos a favor.

Nova executiva

A Executiva que foi elixida con 104 votos a favor e 1 en branco está integrada por persoas cunha longa traxectoria sindical e por cadros sindicais dos sectores emerxentes; por persoas da banca, caixas, telemárketing ou seguros, provintes de todas as zonas do país.

Esta Executiva queda integrada polas seguintes persoas: Clodo Montero de Caixa Galicia, Sefi Romero da CIG, Gladis Afonso e Pilar Cebreiro do Banco Pastor, a nosa compañeira Laura Pérez Figueroa , Iria Salvande da CIG, Xabier Blanco de Axa Seguros, Manolo González de Caixanova e Miguel Fernández do BBVA.

Resolucións aprobadas

O V Congreso aprobou tres resolucións: Unha esixindo a retirada do decretazo do galego e en apoio a Iniciativa Lexislativa Popular; outra de apoio a loita que manteñen os cadros de persoal de Sykes contra a deslocalización e por último unha na que avala que a CIG estude presentar un contencioso administrativo contra o Regulamento do FROB que permite ao BdE liquidar parcialmente e vender a banca privada parte da rede actual das Caixas, na mesma resolución o V Congreso posicionouse contra a entrada de capital privado nas Caixas.

Acto de clausura

No acto de clausura do V Congreso da Federación de Banca, Aforro, Seguros, Oficinas e Telemárketing (nome completo da Federación segundo o aprobado nas modificacións estatutarias), interviron o reelixido Clodo Montero, e o secretario xeral da CIG, Suso Seixo. Ao remate destas intervencións cantouse o himno galego.

Solicitámoslle á empresa que actualice os salarios en base a sentencia do TS

2010-03-30T02:33:00.000-07:00

A estratexia das empresas cuestionando a existencia do IPC previsto polo goberno, correspondente ao ano 2009, está chegando ao seu fin, despois de que o Tribunal Supremo ditase sentenza ratificando a sentenza anterior da Audiencia Nacional contra Sogecable.

No caso concreto do noso Convenio de Contact Center, tiveramos unha sentenza favorable da Audiencia Nacional que se baseaba precisamente na anterior xurisprudencia de Sogecable.

É por iso que unha vez coñecida a sentenza do Tribunal Supremo, temos solicitado formalmente á empresa que se revisen as táboas salariais do 2009.

A suba pactada para o 2009 era do 2,25%, pero as empresas de telemárketing que, insistimos, negaban o IPC previsto, deron un anticipo a conta do 1,25% pendentes da sentenza do TS.

Agora que xa hai sentenza solicitamos que abonen sen máis demora os atrasos do 1% dende xaneiro do ano 2009 ata hoxe e procedan a actualizar as táboas salariais.

É unha miseria, pero é noso.

A patronal non ten intención de negociar

2010-03-24T04:08:00.000-07:00

A patronal de Contac Center, como gustan en chamarse xa que a sociedade considera pexorativo o termo telemárketing, non ten intención de negociar un novo convenio colectivo en tanto non
teñamos sentenza definitiva sobre a suba salarial que nos adebedan correspondente aos anos 2009 e 2010. E aínda que houbera sentenza definitiva dubidamos da súa intención de negociar, están demasiado cómodos co marco actual.

Na reunión prevista para falar de tempo de traballo, cada un dos sindicatos presentamos as propostas recollidas nas distintas plataformas. A patronal contestou na súa liña: quere recortar dereitos en materia de IT e que prefería que en cada unha das reunións presentásemos as nosas propostas para entrar con posterioridade na negociación real.

Cando a ACCE decidiu non pagar a suba salarial defendemos a necesidade de avanzar na unidade de acción sindical e promover mobilizacións xerais no sector para non dar unha imaxe de debilidade sindical ante o abuso patronal.

Noutros sectores onde o persoal gaña máis que no noso e teñen mellores condicións económicas, todos os sindicatos se uniron e mobilizaron, conseguindo acordos de abono da suba prevista á espera da sentenza.

O vindeiro día 14 de abril está prevista unha nova reunión, onde cada quen defenderá a súa Plataforma no referido a Clasificación Profesional. A patronal calará e fixaremos unha nova data para falar dun novo punto.

A negociación do Convenio Colectivo nace bloqueada pola actitude prepotente da patronal, antes que cedo verémonos obrigados a tomar medidas conxuntas e comezar por defender a suba salarial dos anos 2009 e 2010.

Manifestación CIG 10 de marzo

2010-03-11T04:08:00.001-08:00

Defender as pensións, pero tamén o emprego e os salarios

2010-03-08T04:49:00.000-08:00

O 10 de marzo, día da clase obreira galega, a CIG ten convocado manifestacións en todas as cidades galegas, non só contra a reforma das pensións si non tamén en defensa do emprego e dos salarios.

A crise tivo o seu orixe nos Bancos e os gobernos puxeron en marcha rescates multimillonarios que xeraron un gran déficit público (no estado español as axudas ás entidades financeiras poden chegar aos 173.000 millóns de euros mais 82.000 millóns de euros a través do Banco Central Europeo).

Agora co gallo do déficit público a Unión Europea está obrigando aos estados membros a tomar medidas ante a situación de crise económica insistindo na vía dos recortes sociais (en materia de pensións, contratación, dos salarios) e na privatización dos servizos públicos (saúde, caixas de aforros, etc).

Recortes no emprego: O paro bate records e as empresas continúan despedindo.

O número de parados incrementase día a día, xa que as empresas de todos os sectores por todo o país están aproveitando as facilidades para despedir. Pero en moitos casos a crise é unha escusa e no transfundo está a deslocalización de numerosas empresas, como é o caso do telemárketing. Mais ala da defensa dos postos de traballo en cada unha das empresas é preciso dar unha resposta común. Hai que mobilizarse contra o recorte das pensións, pero tamén por estes outros motivos.

Recortes nas pensións: traballar ata os 67 anos.

O alongamento da vida laboral ata os 67 anos, o endurecemento das condicións para xubilarse anticipadamente ou prexubilarse e o incrementos dos anos cotizados para o calculo das pensións responden a unha lóxica perversa. O sistema de pensións público non está en crise, o problema real son as cotizacións intermitentes das persoas novas debido a temporalidade, que ademais implica unhas cotizacións polas bases mais baixas.

Recortes nas condicións laborais: unha nova contra reforma laboral.

Onde as taxas de temporalidade son maiores é maior o medre do paro, pero no canto de reducir e penalizar a temporalidade están negociando unha nova reforma laboral na que a patronal insiste en abaratar os despedimentos e incluso están negociando levantar as poucas restricións ás Empresas de Traballo Temporal.

Pero nesa reforma están falando de flexibilizar aínda mais os horarios ou de modificar a negociación colectiva para alonxala dos seus protagonistas os traballadores e traballadoras.

Recortes nos salarios: Subas máximas do 1% para este ano

O novo pacto de contención salarial asinado en Madrid por CCOO-UGT-CEOE reincide na rebaixa dos salarios, cargando na clase traballadora a saída da crise. Un acordo a tres anos cun tope máximo de incremento salarial do 1% para o 2010, o 1,5% no 2011 e entre o 1,5 e o 2,5% no 2012.

Por todo isto o vindeiro 10 de marzo participa nas manifestacións convocada pola CIG en toda Galiza. Está en xogo que consigamos unha saída mais social fronte a crise ou que nos impoñan novos recortes sociais e laborais.

Acordo e desconvocatoria da folga do 10 de marzo

2010-03-05T23:59:00.001-08:00

Bosch e o Comité de Folga temos chegado a un acordo en aras de manter un clima de dialogo que pasamos a resumirvos:

Articularase unha mesa negociadora entre o Comité de Empresa e Bosch sobre todos e cada un dos puntos recollidos na convocatoria de folga.

En caso de discrepancia ou diferenzas que fagan imposible o acordo, solicitarase a mediación do Xefe da Inspección de Traballo sobre ese punto.

Por parte da empresa adquírese tamén o compromiso de efectuar unha primeira transformación de contratos de posta a disposición a contratos por Obra directos coa empresa. A citada transformación terá como data tope o 1 de abril de 2010 e afectará a 80 persoas.

A elección do persoal que transformará o seu contrato realizarase baixo os seguintes criterios:

Ter cando menos 12 meses de antigüidade cedido en Bosch.
Estableceranse 100 puntos, un 50% por antigüidade; un 10% sobre a formación recibida; e un 40% sobre a valoración do desempeño. En caso de empate teranse en conta as cargas familiares.

Entendemos que estamos ante un novo escenario de negociación que agardamos se traduza en avances nas xustas reivindicacións de todos e todas e ante isto temos optado por desconvocar a folga do día 10 de marzo.

A patronal di que quere reducir custes

2010-03-05T05:10:00.000-08:00

Na reunión do 5 de marzo a patronal dixo dende o inicio que non ia falar de salarios en tanto non estivera pechada a suba salarial. Pero incidiron na necesidade de reducir custes debido a crise para contribuír ao mantemento dos postos de traballo.

Pola nosa parte contestamos que o Convenio 2007-2009 mantivo intactas as precarias condicións de traballo: baixos salarios; inconcreción nas categorías que levan a manter baixos os salarios: altas taxas de temporalidade; facilidades para os despedimentos; horarios ilimitados 24 horas 365 días ao ano; etc. O que non evitou despedimentos no estado e creación de emprego fora.

Evolución do emprego durante a aplicación do convenio anterior.

Polo tanto entendemos que a ameaza de deslocalización non se evita con recortes laborais e defendemos as medidas que reivindicamos na nosa plataforma:

Pluses

-Creación dun plus salarial de antigüidade de 50 Euros ao mes aos 5 anos de antigüidade na empresa baixo calquera modalidade de contratación.

-Que cando se traballe un sábado se perciba un recargo equivalente ao plus de domingos.

-Que o persoal con quenda partida perciba unha dieta de 7 euros ao día.

-Cobro do Plus de Idiomas cando se use un idioma cooficial da propia comunidade autónoma, actualmente pagan a quen fala galego fora de Galiza, polo que pedimos que de manter esa discriminación nos paguen o plus de idioma a nos por falar castelán en Galiza.

Festivos

-Librar o 1 e 6 de xaneiro e o 24 e 31 decembro agás nos servizos de urxencias e emerxencias.

-Cando o día de libranza coincida cun festivo, haberá que compensar ao traballador/a con outro día de libranza.

O día 16 de marzo haberá nova reunión na que falaremos de “tempo de traballo”.

Plataforma CIG II Convenio Contact Center

2010-03-03T04:38:00.000-08:00

Xa tedes a vosa disposición a Plataforma da CIG para a negociación do II Convenio de Contact Center

Grazas por nada

2010-03-03T03:57:00.000-08:00

Como todos e todas sabedes Bosch foi a única empresa do estado que non abonou o anticipo da suba salarial do ano pasado, malia a existencia dunha sentenza clara da Audiencia Nacional no mes de xuño de 2009 que obrigaba a pagarnos o 2,25%. Sentenza recorrida pola patronal.

Dende a CIG solicitamos insistentemente que se abonase ese anticipo como no resto das empresas, como sempre Bosch calou e non contestou.

Un dos motivos das convocatorias de folga era precisamente a falta de actualización dos salarios por parte de Bosch . Que agora digan que abonan a actualización para “evitar que los trabajadores sean los perjudicados” é un cachondeo.

E lamentable que os traballadores e traballadoras de Bosch teñamos que ir a folga para conseguir o que xa tiveron no resto das empresas o ano pasado. En todo caso grazas a folga do día 15 de febreiro conseguimos que Bosch nos pague o que nos debía, o que xa era noso.

De todos os xeitos o pasado día 23 de febreiro celebrouse na Audiencia Nacional un xuízo por un conflito colectivo que nos apoiamos, para que se execute a sentenza e nos abonen o 2,25% tal e como establecía o Convenio e recoñeceu a sentenza anterior da Audiencia Nacional, non o 1,25%. Estamos a espera de sentenza.

Agardamos que coa folga do 10 de marzo a empresa continúe dando pasos e que chegue a pagarnos o 2,25%; que recoñeza as categorías do persoal; que dea marcha atrás na decisión de reducir xornadas; que nos explique que pasa con Vodafone e que regularice dunha vez os contratos temporais e de ETT.

PARA QUE NON NOS PAREN, PARA O 10 DE MARZO

Folga o 10 de marzo

2010-03-01T03:28:00.000-08:00

Como todos e todas sabedes a convocatoria da anterior xornada de folga foi aprobada en asembleas e tiña como obxectivo sentar a Bosch a negociar unha plataforma aprobada polo persoal e para defender os nosos postos de traballo, nomeadamente os da campaña de Vodafone afectados pola deslocalización. Na folga do día 15 de febreiro coincidimos co persoal de Sykes, empresa na que xa hai despedimentos do persoal temporal pero tamén do persoal fixo.

Vodafone anunciou a todas as empresas de telemárketing que está nun reaxuste interno e que facilitará datos da carga de traballo que quedará no estado se saberá o 31 de marzo, precisamente a data de remate de varias campañas.

Bosch mantivo unha reunión co cliente e quedaron en confirmar a posición de Vodafone, a calada por resposta nos confirma o pior.

A Conselleria de Traballo quedou en falar con Vodafone, a día de hoxe non confirmou tampouco a posición de Vodafone, a Xunta de Galicia non se quere pringar.

A Inspección de Traballo ofertouse para mediar entre as partes, a CIG confirmou a súa vontade negociadora, pero a reunión non foi posible entendemos que faiou a terceira pata nesa negociación: Bosch.

A situación xeral non se viu modificada, en todo caso empeorou, e nas asembleas anteriores quedou claro que si non había negociación convocaríamos unha nova xornada de folga. Pois a folga está convocada para o vindeiro día 10 de marzo, unha data simbólica.

Pd. Ese mesmo día coincidiremos cunha folga no metal en vigo, polo que teremos que confirmar o lugar e horas das concentracións.

A loita continúa

2010-02-22T14:22:00.000-08:00

O pasado 17 de febreiro, as delegadas de Sykes e Bosch, fomos recibidos polo Director Xeral de Relacións Laborais da Consellería de Traballo en Santiago para expoñerlle a preocupante situación que estamos a vivir o persoal de ambas empresa.

A Consellería de Traballo comunicounos que ten previsto convocar a Vodafone a unha reunión no prazo máximo de duas semáns para coñecer os plans da empresa e tentar que o traballo permaneza en Galiza e no pior dos casos que as posibles medidas traumáticas sexan espaciadas no tempo. Nos insistimos que é agora cando Vodafone está decidindo que carga de traballo irá para fora e canta quedará aquí, cando debemos incidir para garantir os postos de traballo.

A Consellería comunicounos que está disposta a chegar a unha medida alternantiva como xa fixera na empresa Eurocen na Coruña con Movistar. Esta medida consiste en facer que Vodafone deslocalice de xeito progresivo para que as empresas afectadas poidan procurar novos cliente (coa axuda da Xunta de Galicia) e formar o persoal afectado para a atención de novos proxectos a través de cursos pagados con compromiso de contratación. Nos insistimos que o principal é salvar os postos de traballo das campañas de Vodafone.

Comentaron que a Dirección Xeral de Relacións Laborais mantivo unha reunión con Sykes, para explicarlle esta posiblidade pero que Bosch non pediu ningún tipo de reunión En todo caso indicousenos que nos manterán informados de todas as accións que se vaia na levar acabo.

Por outro lado, a Inspección de Traballo propuxo unha reunión con Bosch, que aceptamos e que está pendente de data, queremos sentarnos a negociar os motivos quen os levaron a mobilizarnos o pasado 15 de febreiro.

Todos os frentes estan abertos, algo que xa lle avisamos tanto a Delegación de Traballo como a Inspección, estamos dispostos a convocar xa unha nova xornada de folga para seguir reivindicando os dereitos de todos os traballadores e traballadoras de Bosch. Hai unha plataforma que debe ser negociada punto por punto.

Seguirémosvos informado.

A folga nas televisións

2010-02-17T23:25:00.000-08:00

Televisión Española aquí.

Nova reunión da Mesa Negociadora

2010-02-15T15:44:00.000-08:00

Como punto previo á reunión pedimos un posicionamento da mesa negociadora en contra do actual proceso de deslocalización de Vodafone que afecta a varias plataformas a nivel galego. Recibimos o apoio da CGT, CCOO e UGT, din que se opoñen a deslocalización pero é un problema legal que non corresponde a mesa negociadora. ACCE non se quere manifestar contra “os seus clientes”... pois vale.

Os sindicatos demandamos como punto previo que se cumpra a suba salarial do anterior convenio, negándose a patronal por estar ademais xudicializada a cuestión. A CIG quere que se abone o 2,25% pactado, incluíndo unha cláusula que non nos obrigue a devolver diñeiro se a sentenza do Tribunal Supremo fose favorable ás empresas. Tamén temos que denunciar a outros sindicatos que “protestaron” polo impago e agora piden subas do 1% para este ano e nas súas plataformas, volven ligar o salario ao IPC.

Posteriormente decidiuse continuar coa negociación, a espera da resolución xudicial e entregáronse as distintas plataformas. Como introdución, solicitamos que se podan negociar convenios a nivel galego e de empresa, que podan mellorar as condicións laborais de xeito pactado, para pasar as nosas reivindicacións básicas:

SALARIOS

Dixemos que a CIG non está atada polo acordo interconfederal (asinado por CCOO, UGT e CEOE) que recolle unha suba para o ano 2010 entre o 0 e o 1%. Reclamamos unha suba lineal de 540 euros.

Defendemos tamén a creación dun complemento por antigüidade de 50 euros por paga, a cobrar a partir dos 5 anos na empresa.

EMPREGO

Despois de 11 anos, o sector non se pode considerar en vías de consolidación, a temporalidade é inaceptable, o emprego estable é o emprego fixo. A temporalidade debe acotarse á causalidade só para casos moi concretos. Así mesmo os despedimentos colectivos deben ampararse na lexislación básica, desaparecendo as excepcións que contempla o Convenio.

XORNADA

É preciso reducir o tempo de traballo para crear emprego, reivindicamos a xornada de 35 horas sen rebaixa salarial. Así mesmo reivindicamos medidas para ampliar o tempo de descanso.

CARREIRA PROFESIONAL

A comisión creada non serviu para nada. É preciso redefinir o catálogo de postos neste convenio sen máis dilación.

Apostamos pola creación de 2 novas categorías: teleoperador de 1ª e xestor/a de 1ª cun incremento salarial do 4% sobre as táboas actuais.

Quedaron fixadas 2 novas reunións para o 5 e o 16 de marzo. Na do día 5 trataremos incentivos, pluses e tempo de traballo.

Por parte da CIG farémosvos chegar a nosa Plataforma nos vindeiros días co fin de que coñezades as reivindicacións que trasladamos á mesa.

Bosch terá reuníon maña na Consellería de Economía

2010-02-11T09:47:00.000-08:00

A Consellería de Traballo está preocupada ante a situación creada e a Delegada Provincial decidiu convocar a Bosch para o venres día 12 ás 10 da maña co fin de coñecer o impacto real do proceso de Vodafone. A Inspección de Traballo estará presente para asesorar a Consellería dende o punto de vista legal.

Comunicarvos que Vodafone xa fixo contratos para levar as campañas do Estados Español coas seguintes empresas de telemarketing en Latino América:

Colombia: “Estategia Contact Center”; “Global Sale Solution” e “Emergia América Call Center”. En Colombia unha teleoperadora cobra 173 $.

Perú: “Global Sale Solution”. En Perú unha teleoperadora cobra 151 $.

Chile: “Unísono Chile”, “Telemárketing Golden Line”. En Chile unha teleoperadora cobra 223 $.

Non se trata de que traballemos mais, ou que esforzandonos mais Vodafone poda quedar aquí, a non ser que estemos dispostos a cobrar 120 euros ao mes.

Dicir que Bosch comunicounos uns Servizos Mínimos do 50% para a maior parte dos servizos, cando só a autoridade gobernativa pode facelo e só para servizos fundamentais (non é o caso). Non hai obriga de cumprir servizos mínimos, algo que agardamos maña a Consellería e a Inspección lle aclaren a Bosch.

Con esta medida tratan de crear incertidume ante unha folga que está legalmente convocada e na que democraticamente pode participar o persoal de Bosch e o persoal contratado a través de ETT. O dereito a folga é un dereito fundamental recollido incluso na propia constitución.

Nunha vulneración da boa fé, Bosch aproveitou que tiña reunido ao Comité de Empresa e non había delegadas na platafora para comunicar o fin de campaña de Orange-Empresas a persoal. Suma e segue.

Temos posto en coñecemento da autoridade laboal estas cuestións, así como outras medidas anti-sindicais (recollidas de sinaturas contra a folga por parte de mandos da empresa, etc). Cuestións que poden ser un delito por tratar de impedir o libre exercicio dun dereito fundamental como é a folga.

En todo caso as novidades que hai son negativas, polo que mantemos a convocatoria da folga para o día 15 de febreiro.

Solicitarvos a todas aquelas persoas que exerzades o voso dereito democraticamente que botedes unha man dende primeira hora da maña nos respectivos centros de traballo, pero que as 12:00 horas procedades a concentrarvos con nos diante de María Berdiales.

Motivos para a primeira xornada de Folga

2010-02-11T03:09:00.000-08:00

O día 9 o persoal de Sykes respostou masivamente ao noso chamamento a mobilización contra os despedimentos masivos que no seu caso afectan a Vodafone, pero tamén a campaña do 1004. O vindeiro día 15 o persoal das dúas empresas converxeremos nun conflito polo mantemento dos postos de traballo fronte a deslocalización e no noso caso tamén para que Bosch se sente a negociar unha mellora nas nosas condicións laborais.

O mesmo día 9 Bosch recoñeceu tanto na reunión co Comité, como nunha carta interna ao persoal que non saben que vai ser da campaña de Vodafone, pero que ese cliente pretende reducir o volúme dos servizos no estado español e que unha das opcións é utilizar plataformas en Latino América. Dixo tamén que o contrato mercantil de CAC_REC TELE-2 ten como data de remate o 31 de marzo de 2010, algo que non afecta as persoas fixas que traballan nesa campaña pero si ao resto.

Pero é falso que houbera avances reais na negociación entre Bosch e o Comité de Empresa, nin que tiveramos acordos en ningunha das xustas reivindicacións que presentamos, alongando a empresa a negociación sine die.

No noso blog en internet podedes consultar as autorizacións internacionais de datos concedidas a Vodafone para trasladar o noso traballo a 6 empresas de Latino América. Son enlaces á propia páxina da AEPD do Ministerio de Xustiza, as cousas claras.

Temos ata final de marzo para intentar salvar os postos de traballo, involucrando a administración galega e española para que non permitan que Vodafone e Bosch nos deixen na rúa. Coa convocatoria das mobilizacións, paros e folga estamos dando pasos nese sentido.

O vindeiro día 17 de febreiro seremos recibidos pola Consellería de Traballo en Santiago e xa está efectuada a pregunta ao goberno central no parlamento español.

Nas campañas de Vodafone eramos 891 persoas traballando en Bosch Vigo, dende o venres 52 menos. Si perdemos o posto de traballo mal poderemos negociar melloras,pero queremos traballar en Europa con condicións de traballo europeas, non rebaixar as condicións para traballar coas condicións de Perú ou Colombia, a saída que propón Bosch.

PARA QUE NON NOS MANDEN AO PARO: PARA O 15 DE FEBREIRO

A Vodafone non lle importa a calidade de servizo, as condicións de traballo nin os dereitos laborais

2010-02-10T03:30:00.001-08:00

Nunha breve mirada ao google poderedes ver as opinións sobre algúns dos centros de chamadas para os que Vodafone levará o noso traballo.

Destacar a deslocalización para Colombia o país con maior número de asasinatos de sindicalistas do mundo. Un país que non respecta os dereitos humáns nin a liberdade sindical, pero iso abarata custes, non é?

E si as condicións de telemárketing aquí son malas imaxinade en Perú ou Chile.

O propio goberno de Perú destaca entre as ventaxas de instalar Call Centers nese país que non existen sindicatos (páxina 5) e o persoal gaña só 151$ ao mes, fronte aos 173$ de Colombia ou os 233$ de Chile (páxina 7).

Documentación deslocalización Vodafone

2010-02-10T02:28:00.000-08:00

Para o voso coñecemento aquí podedes consultar as autorizacións concedidas pola AEPD (Axencia Estatal de Protección de Datos) dependente do Ministerio de Xustiza, así como a pregunta no Parlamento Español.

Autorizacións de Vodafone para centros de chamadas de América Latina:

Estrategia Contact Center Colombia

Unísono Chile

Global Sale Solution Perú

Global Sale Solution Colombia

Emergia América Call Center Colombia

Telemárketing Golden Line Chile

Pregunta presentada polo deputado do BNG Francisco Jorquera ao goberno español.

Así mesmo Bosch na circular interna dirixida ao persoal recoñece que "El cliente se ve en la necesidad de reducir costes y volúmenes para los servicios de atención al cliente en España, principalmente mediante las siguientes opciones", no punto di C) que:

"Utilizar, en mayor medida, plataformas en Latino América para servicios de menor complejidad (reducción de coste laboral, traslado de areas a L.A."

A empresa confirmou tamén que o contrato de CAC_REC Vodafone ten como data de remate o 31 de marzo de 2010.

Escolla de prensa coa mobilización do persoal de Sykes.

2010-02-10T01:55:00.000-08:00

La Voz de Galicia

La Opinión A Coruña

Correo Gallego

SYKES E BOSCH A MESMA LOITA CONTRA A DESLOCALIZACIÓN

As compañeiras e compañeiros de Sykes comezan as mobilizacións e paros

2010-02-09T10:00:00.000-08:00

Mobilización diante de Sykes na Coruña na quenda de maña. Para mais información pincha enriba da foto.

Folga en Bosch o 15 de febreiro

2010-02-08T15:28:00.000-08:00

Ao longo das últimas semanas viñemos mantendo asembleas co fin de dar resposta a situación laboral na empresa. O pasado venres Bosch anunciounos despedimentos e novos recortes que nos confirman o que viñamos plantexando.

O ano pasado Vodafone solicitou 6 autorizacións á AEPD (Axencia Estatal de Protección de Datos) dependente do Ministerio de Xustiza, para transferir os datos dos clientes e polo tanto poder deslocalizar os servizos a Colombia, Chile e Perú.

Tele-2 ten data de remate o 31 de marzo, a partir da cal desaparecerá o produto tele-2 e só quedará Vodafone. Esa data parece como o posible fin da campaña debido a deslocalización polo que a CIG convocou mobilizacións, paros e folga en Sykes na Coruña e Bosch en Vigo.

Xa temos tamén confirmada unha reunión da CIG coa Consellería de Traballo para que a administración galega interveña para garantir os postos de traballo e falamos co deputado Francisco Jorquera do BNG para que o Ministro de Xustiza compareza no parlamento español e dea explicacións.

En todo caso a folga non só está motivada pola deslocalización de Vodafone que ameaza 500 empregos en Bosch Vigo, os motivos son os seguintes:

1º Deslocalización de Vodafone, campaña para a que traballan 500 persoas en Bosch Vigo. Comunicando a empresa reducións de xornada e 52 despedimentos.

2º Salarios conxelados dende o 2008. somos a única empresa do sector onde non se subiu nin sequera o 1,25% do salario.

3º Asignación das correctas categorías profesionais, na nosa empresa non se recoñece a profesionalidade e tarefas que se realizan nos diferentes departamentos.

4º Acabar coa temporalidade, temos unha vaga promesa da empresa de facer 4 pasos masivos a plantilla este ano e xa no primeiro danlle mais valor ó desempeño que a antigüidade.

5º Que o 60% dos horarios sexa en quenda continua: din que polas curvas de chamadas non é posible cousa que non se aplica na realidade, ademais dinlle os axentes que fagan quendas de 14:00 a 22:00 (fóra de Convenio) e se non a aceptan póñenlle unha quenda partida.

6º Cumprir co que se indica no Convenio e dar o período de descanso semanal de xeito ininterrompido.

7º O exceso de horas do ano pasado debe ser considerado como horas extras e negocialo con cada traballador non decidir a empresa de xeito unánime como disfrutalo.

O vindeiro 15 de febreiro temos que saír a rúa todos e todas para defender os postos de traballo e exixir unha negociación real por parte da empresa.

PARA QUE NON NOS MANDEN AO PARO:

PARA O 15 DE FEBREIRO!!!!

Seguiremos informando.

O Ministerio de Xustiza autoriza a deslocalización de Vodafone poñendo en perigo 700 postos de traballo en Vigo e A Coruña

2010-02-08T15:24:00.000-08:00

A AEPD (Axencia Estatal de Protección de Datos) dependente do Ministerio de Xustiza, dirixido por Francisco Camaño que visitou este sábado Galiza, autorizou a Vodafone para que poda deslocalizar os distintos servizos de atención ao cliente que dan traballo en Galiza a mais de 700 persoas subcontratadas por varias empresas de telemárketing.

Para que unha empresa dentro do estado transfira datos a outra requírese o consentemento previo dos clientes. Porén, o organismo dependente do Ministerio de Xustiza, estima que cando a cesión é internacional, concretamente a paises de América Latina non é preciso. Un absurdo que permite ás empresas de telecomunicacións deslocalizar todos os servizos de atención aos clientes fóra do Estado.

Este é o caso actual de Vodafone, que solicitou 6 autorizacións a AEPD para transferir todos os datos dos seus clientes a Colombia, Perú ou Chile, coa única garantía dun contrato privado entre empresas e con total descoñecemento da clientela. Os datos dos clientes de Vodafone (persoais, económicos, etc) estarán espallados por medio mundo e incluso en países considerados perigosos polo Ministerio de Exteriores.

A transferencias dos datos da clientela é o primeiro paso para que se deslocalicen todos os servizos de atención á clientela que actualmente se realiza entre outras empresas nas plataformas de telemárketing de Sykes na Coruña e en Vigo nas plataformas Unísono e Bosch. En toda mais de 700 postos de traballo en Galiza aos que hai que sumar os despedimentos do persoal de Sykes que traballan na campaña do “1004” de telefónica, tamén deslocalizada por telefónica con anterioridade.

Complicidade do goberno central

Neste senso os despedimentos e recortes na Coruña e Vigo son froito dunha decisión empresarial coa complicidade do goberno central. Dende a Confederación Intersindical Galega queremos denunciar que non estamos ante os efectos da crise, estamos ante unha deslocalización pura e dura por parte de Vodafone e Telefónica coa complicidade do goberno do PSOE.

Ante a visita do Ministro de Xustiza a Galiza este fin de semana, queremos solicitar unha rectificación da autorización concedida por un organismo do seu Ministerio, que beneficia claramente a unha multinacional “Vodafone”, poñendo en perigo os postos de traballo de 700 persoas na Galiza.

En todo caso, dende a CIG, xa temos convocado mobilizacións, paros e folgas nas distintas empresas afectadas, sen que descartemos medidas sectoriais fronte a un novo proceso de deslocalización no sector dos centros de chamadas. En Bosch, os traballadores e traballadoras irán á folga o vindeiro día 15 de febreiro e por esas datas tamén están previstas mobilizacións en Sykes.

Constituída a mesa negociadora do II Convenio de Contact Center

2010-01-22T05:11:00.001-08:00

Por fin hoxe día 22 de xaneiro, constituíuse a Mesa negociadora do II Convenio Colectivo de Contact Center, na que a CIG estará presente para trasladar a voz e defender directamente e sen intermediarios os intereses dos traballadores e traballadoras de Galiza.

O Convenio é a norma básica que regula as nosas condicións laborais: en materia de salarios, contratacións, horarios, despedimentos, etc., polo que entendemos que a vosa participación será decisiva ante a difícil negociación que teremos que afrontar.

Inicialmente a CIG e os sindicatos vascos ELA e LAB solicitamos a constitución de mesas negociadoras de ámbito galego, no noso caso, e vasco no deles, posibilidade que contempla a vixente lexislación e que nós defendemos. A proposta foi rexeitada pola Patronal.

Unha vez constituída formalmente a Mesa a nivel estatal, que estará integrada por CIG, LAB, ELA, CGT, CCOO e UGT, marcouse para o vindeiro día 12 de febreiro a primeira reunión de traballo.

Dende a CIG defendemos que o actual convenio precisa unha fonda, moi fonda revisión, que garanta o mantemento dos postos de traballo e unhas condicións dignas. O ámbito estatal caracterízase polos baixos salarios, a contratación precaria, a facilidade dos despedimentos ou xornadas laborais continuadas de ata 10 días. Nós defendemos outro marco: o galego.

En todo caso a Patronal aposta por manter centralizada a negociación para manter as precarias condicións laborais. Nós apostamos por outra vía, pero continuaremos representando os vosos intereses na Mesa negociadora estatal para tratar de avanzar, sabendo que non é o mellor marco para conseguilo.

Asambleas persoal HD

2010-01-18T15:46:00.000-08:00

Dende a Sección Sindical da CIG en BOSCH querémosvos convocar unha asemblea para o persoal de HD PROV, HD TESA e HD TEC, con motivo da comunicación da baixa de volume de traballo en HD PROV e a posible recolocación en HD TEC e HD TESA

Non faltedes, a cita é:

Data: Xoves, 21 de xaneiro de 2010 as 20:00 horas

Lugar: Local Comarcal da CIG na Rúa Gregorio Espino, 47 entrechán – Vigo.

2009-10-01T04:17:00.000-07:00

Desconvocatoria da FOLGA. Acadado acordo coa empresa

O Comité infórmavos de que a raíz da convocatoria de folga, a empresa convocounos a unha reunión que tivo lugar o pasado martes. Nesta reunión expuxémoslle á Dirección as nosas reivindicacións e finalmente despois de diversas negociacións ao longo destes días, hoxe 1 de outubro, asinamos un acordo coa empresa que recolle as nosas demandas.

Neste acordo, a empresa afirma que:

-É vontade da mesma que Vigo sexa a sede principal de Bosch a pesares da apertura de outros centros fóra da cidade.
-Se están facendo obras en Vigo-3, para ampliar 140 postos de traballo máis, ademais da adecuación dun novo edificio. Co obxectivo de ampliar o volume de negocio de Bosch en Vigo.
-Se vai entregar a este comité a documentación a respecto dos contratos con clientes que están en vigor, tanto os modificados como os novos.
-O día 4 de novembro teremos a primeira xuntanza da comisión negociadora de incentivos para todo o persoal, porcentaxe de traballadores/as de ETT’s e clasificación profesional.

Este comité entende que grazas ao apoio de todos e todas vós, acadamos os obxectivos polos que se convocaba esta folga. Sabemos que o camiño non vai ser doado, pero temos a seguridade de que estamos ante un punto de inflexión significativo no cambio de modelo das relacións laborais en Bosch-Vigo.

Carta aberta a Walter Soltau ou “Arxentina non é España”

2009-09-15T09:14:00.000-07:00

Ante a circular de contestación remitida pola empresa a todos os traballadores e traballadoras de Bosch, preferimos pensar que houbo un erro na tradución do alemán; ou simplemente que o senso do humor xermano é claramente diferente ao galego.

Nunha primeira parte divaga sobre a crise, unha crise que serve de escusa para xustificar o que faga falta. Di que a crise é unha oportunidade; pero señor Soltau, a crise para os traballadores e traballadoras que perden o seu emprego é unha ....

No noso comunicado acusabamos a Bosch de perder campañas rendibles porque “no colmaban las expectativas de beneficios de la empresa”. Neste senso a circular remitida por vostede di que o primeiro valor de Bosch é conseguir beneficios. Non temos máis que dicir, a súa sinceridade neste punto é de agradecer.

Noutro punto di que “Hemos crecido en España (sin Buenos Aires), un 24%”.

Saiba señor Soltau que Buenos Aires, está en Arxentina, un país que conseguiu a independencia de España o 9 de xullo de 1816. Arxentina non é España!!!.

Por outra parte, se Bosch medrou un 24% no Estado español, faríao en Madrid, porque en Vigo houbo despedimentos, suspensións de contratos e reducións de xornada xustificadas en base a unha suposta baixada do volume de chamadas. Ou Bosch mentía cando despediu alegando baixada do traballo ou minte agora cando di que medrou un 24% no último ano.

Neste mesmo senso, indicarlle que para vostede será unha boa noticia medrar fóra a costa de Bosch Vigo. Pero para nós, os traballadores e traballadoras de aquí é a peor das noticias,xa que significa que imos ao paro. Neste senso por favor, non nolo refregue polo nariz.

Queda máis claro que nunca que estamos en liquidación parcial ou temporal. Perdemos campañas porque Bosch quere, e o noso traballo está sendo desviado a Madrid, Buenos Aires e proximamente a... Barcelona.

Grazas polo seu escrito Sr Soltau, sabemos que cando Bosch Vigo peche vostede continuará traballando na empresa, por iso entendemos que non pense ir a FOLGA para defender os nosos postos de traballo. Pero non nos molesta, nós tampouco faríamos unha folga para defender o seu.

Nota: Estamos nunha empresa que quere xogar en primeira división, pero cobramos uns salarios de terceira división e temos unha equipa directiva de rexional preferente.

A liquidación parcial ou total de Bosch Vigo fai precisa unha FOLGA

2009-09-14T02:00:00.000-07:00

Cando aínda estamos inmersos nas consecuencias do fin de obra de HD residencial, dado que Bosch e Unísono están actuando de xeito fraudulento para deixar fóra da recolocación ás persoas de ETT, ofertando xornadas semanais ínfimas co fin de que a xente renuncie a recolocarse en Unísono (xa que afectaría incluso ao futuro paro que cobrarían), hoxe temos o "fin de obra" en UP&CROSS.

Agora a empresa comunicou a persoal de UP&CROSS que remata esa campaña (o Comité de Empresa non ten comunicación, pero reclamada información á empresa alegou que se debe a unha baixada do volume de chamadas). Como saída, están ofertando o fin de obra ou a recolocación en Orange Televenda (campaña na que foron despedidas un bo número de persoas antes do verano).

Pero HD residencial e UP&CROSS non son casos illados, practicamente en todos os departamentos hai suspensións de contratos e reducións de xornada.

Se Bosch perdeu os contratos non foi por culpa dos traballadores e traballadoras que cobramos o mesmo que en Unísono. A perda dos contratos con Vodafone é atribuíble unicamente á Dirección de Bosch, xa que as novas condicións do contrato “no satisfacían las expectativas de beneficio por parte de la empresa”.

A situación é grave, pensamos que Bosch pretende liquidar total ou parcialmente a plataforma de Vigo. Estamos pendentes dunha reunión urxente coa Inspección de Traballo para que nos informe das xestións realizadas por ese Organismo público para garantir os nosos postos de traballo.

En todo caso xa anunciamos que ante a actuación de Bosch, pensamos que é precisa a convocatoria dunha FOLGA, decisión para a que contaremos con todos e todas vós.

Comezan os xuízos polos últimos despedimentos

2009-07-21T03:02:00.000-07:00

O venres 24 terá lugar o primeiro xuízo polos despedimentos, estando previsto o segundo para o día 28.

Seguiredes informados/as.

Explotación para a túa vida BOSCH

2009-07-07T05:52:00.000-07:00

Video mobilización conxunta Comité de Empresa dia 7 de xullo en María Berdiales.

Mobilización conxunta do Comité de Empresa contra os 60 despedimentos

2009-07-07T03:35:00.000-07:00

Finalmente hoxe ás 11:00 da maña houbo unha concentración de delegados e delegadas convocados polo Comité de Empresa, co apoio de todas as centrais sindicais con presencia en Bosch. Lembrar que o Comité de Empresa está composto por 12 delegadas/os da CIG, 4 de CCOO e 1 da UGT.

A mobilización tivo lugar no centro de traballo na rúa María Berdiales e foi convocada para protestar polos 60 despedimentos nas plataformas de Vigo.

Uns despedimentos que non son illados, xa que son habituais na política laboral da multinacional en Galiza.

Agardamos poder colgar hoxe unha reportaxe gráfica con fotos e vídeo desta concentración conxunta.

Despedidas readmisión!!

Si esto non se amaña, iremos a Alemania!!!

Mais despedimentos...e van 60 nos últimos tempos

2009-07-01T05:11:00.001-07:00

O pasado venres RRHH "informou" verbalmente de que habería despedimentos en varios departamentos, alegando unha suposta baixada de volume de traballo, que segundo eles non teñen que demostrar dado que se trata de persoal de ETT.

Anunciaron que os despedimentos serían comunicados o luns ao persoal malia que os serian efectivos o venres.

Onte pola tarde tiñamos constancia de 18 despedimentos no departamento CAC_REC, onde obrigaron a perto de 40 persoas a coller as vacacións forzosamente neste mes, medida que tamén tomaron noutros departamentos. En “Fidelización” onte constatamos 3 despedimentos.

Como noutras ocasións lembrade que debedes asinar cun "non conforme" para salvagardar o voso dereito a reclamar con posterioridade, xa que non sempre liquidan correctamente. E posteriormente poñervos en contacto co sindicato para que revisen as liquidacións.

Demandamos da empresa que informe correctamente e que remita unha comunicación da relación das persoas despedidas así como que demostren a baixada de volume de traballo conforme ao Convenio.

Estes despedimentos únense aos realizados no último mes, podendo superar segundo os nosos datos as 60 persoas despedidas, tanto de ETT como de empresa.

Xa estamos en contacto con este persoal co fin de artellar unha resposta colectiva ante uns despedimentos inxustificados e polo tanto inxustos. Así mesmo e mais ala das demandas individuais que podan interpoñer as persoas afectadas, xa estamos estudando coa nosa Asesoría Xurídica as medidas colectivas a tomar.

Balance Sindical nº 20

2009-06-12T10:07:00.000-07:00

Xa está na rúa o voceiro da Federación, un novo número da edición en papel do "Balance Sindical" que repartiremos en man na empresa, podes consultaro en internet a través do seguinte enlace.

Balance Sindical n 20

Publish at Calaméo or browse others.

Exceso de xornada: Coidado coa empresa!!

2009-06-11T04:52:00.000-07:00

O Estatuto dos Traballadores/as, establece que a efectos do cómputo de horas extras, a xornada rexistrarase día a día e totalizarase mensualmente, entregando resumo ao traballador/a no recibo correspondente.

O ano pasado, debido a unha mala organización das quendas e ao non disfrute dos festivos (tal e como requiriu a Inspección de Traballo), houbo moitas persoas que superaron as 1.764 horas anuais (para os contratos de 39 horas).

O exceso de horas traballadas teñen a consideración de horas extras que deben retribuírse conforme ao artigo 51 do Convenio:

a) Horas extraordinarias diúrnas: entre as 6 e as 22 horas, abonaranse cun incremento do 25% sobre as horas ordinarias.
b) Horas extras nocturnas: entre as 6 e as 22 horas, incremento do 60% sobre as ordinarias.
c) Horas extras diúrnas festivas: entre as 6 e as 22 horas, incremento do 60% sobre as ordinarias.
d) Horas extras nocturnas en festivo: entre as 22 e as 6 horas, incremento do 80% da hora tipo ordinaria.

Como vedes a retribución das horas extras sempre ten un incremento sobre as horas ordinarias.

Pero o convenio di que en caso de pacto individual cada hora extra poderá compensarse cunha hora de libranza. A empresa está chamando individualmente a xente, quen acepte perderá o dereito ás recargas establecidas arriba.

Quede claro que as persoas que fixestes un exceso de xornada tedes dereito a que vos paguen as horas coa recarga correspondente, se o preferides en lugar da libranza.

Por último recomendar que anotedes día a día, e mes a mes, as horas que facedes, para poder comprobar a final de ano o exceso de xornada.

Bosch debe pagar o 2,25% de suba salarial deste ano

2009-06-11T01:21:00.000-07:00

A Audiencia Nacional fallou a favor do persoal en demanda presentada pola representación sindical, incluida a CIG, contra a decisión da patronal de telemárketing de non abonar a suba salarial prevista no Convenio para o ano 2009.

Sentenza xudicial gañada, Bosch debe implantar control horario

2009-06-10T05:28:00.000-07:00

Non é a primeira vez que Bosch sanciona a un compañeiro ou compañeira alegando falta de puntualidade; agora o Xulgado do Social acaba de declarar improcedente unha sanción a un afiliado da CIG, debido a que tal e como di a sentenza “non existe na empresa un sistema que determine as horas de entrada e saída”.

Dende a CIG sempre defendemos que o control horario debe realizarse na entrada do centro do traballo tal e como establece a lexislación, mentres a empresa pretende que o control sexa no teléfono.

Todos e todas sabemos que dende a chegada á empresa, ata que unha persoa está conectada no teléfono, poden pasar varios minutos por distintos motivos: que haxa aglomeracións na entrada, que teñamos que agardar ata que quede libre un ordenador, que a nosa coordinadora decida onde nos sentamos, etc.

Ante esta situación moitas persoas optan por chegar antes de tempo co fin de non ser sancionadas, facendo máis horas das que deben por culpa dunha mala organización da empresa.

Despois desta sentenza, que anula a suspensión de emprego e soldo por chegar tarde, entendemos que Bosch debe establecer un sistema de control horario na entrada do centro de traballo.

Manifestación solidariedade co Metal

2009-06-08T04:57:00.000-07:00

O martes 9 de xuño ás oito da tarde terá lugar unha manifestación na cidade de Vigo, convocada por CIG, CCOO e UGT, en solidariedade coa loita do Metal e en apoio aos milleiros de traballadores que despois de seis xornadas de folga continuarán nesta semana cunha nova convocatoria de folga, que desde o mércores será indefinida e que o venres esta folga terá carácter xeral polo que están chamadas todas as empresas do sector, mesmo aquelas que teñen convenio propio. A continuación reproducimos un folleto que vai ser repartido á cidadanía, chamando á convocatoria desta manifestación, que sairá ás oito da tarde do cruce de Gran Vía con Urzáiz e que rematará na Praza da Estrela.

Os traballadores e traballadoras do Metal a toda a cidadanía:

Queremos transmitirvos a nosa verdade por medio deste escrito xa que os acontecementos diarios son constantemente deformados interesadamente por algúns medios de comunicación, que tamén son empresas.

Antes de nada pedir desculpas polos trastornos que causamos nas nosas manifestacións, e sobre todo cando son disoltas de xeito brutal pola policía recaendo tamén nos cidadáns os golpes e pelotazos. Incluso os danos materiais nos negocios que por darnos acollida aos manifestantes, as súas cristaleiras son abatidas a queimarroupa en diferentes lugares da cidade.

Os 23.000 traballadores do Sector do Metal na Provincia, soldadores, mecánicos, chapistas, caldereiros, electricistas, torneiros, fresadores, pintores, fontaneiros, etc, somos os pais dos mozos e mozas que andan polas rúas da cidade, somos os irmáns, primos, fillos e fillas, os amigos e amigas que coñecedes, os amigos dos vosos fillos e das vosas fillas, somos como a inmensa maioría, traballadores que cobramos sobre mil euros en oito horas, e como non chega para pagar os gastos da casa e todo o demais, moitos de nós traballa once horas ao día, e por esta razón, cando chegamos aos cincuenta anos temos diferentes lesións incurábeis.

Todos os anos vemos falecer algún compañeiro en accidente laboral, mentres os nosos Patróns non renuncian aos seus chalets con piscinas nin aos seus barcos nin as grandes comidas nos mellores restaurantes. Eles nunca acaban pobres. Moitos empresarios non cumpren a Lei que é o noso Convenio, e traen traballadores de fora pagándolles a metade do salario, porque nós debemos resultarlles caro. Esta é a verdade do Metal.

Pedimos 0,50€ de incremento por hora traballada, pero eles xa subiron mais de 3 € na mesma hora aos seus clientes. Falan de crise e aproveitan para despedir de maneira barata, mentres reciben millóns de axuda pública do diñeiro que nos pagamos como impostos. Din que xa perderon 70 Millóns de € con esta Folga, pois con este diñeiro pagarían 6 anos do incremento salarial que pedimos. Din que resultamos caros con esta crise, pero os nosos salarios son moito mais baixos e temos mais contratos precarios que en Cataluña, Madrid, Francia, Alemania, Bélxica, ou acaso nestes lugares non lles afecta a crise?

Pensa en quen son os Agresores e quen os Agredidos. O noso Convenio axuda a mellorar o resto dos Convenios, por esta razón toda a Patronal quere vencernos, someternos e voltar a ter ao 70% de traballadores eventuais, despedir libremente, contratar ETTs, non pagar as horas extras obrigadas, non dar os días de descanso, e quedarse cunha parte maior dos nosos salarios. A nosa loita é por dignidade e ti sabes do que falamos.

Asembleas persoal HD

2009-05-25T01:17:00.000-07:00

Dende fai mais dun ano estamos tratando de negociar coa empresa un acordo polo que se recoñeza o traballo específico do persoal de Help Desk.

Pensamos que ata o de hoxe era un problema dos traballadores/as, do que Bosch tiraba un gran beneficio económico.

Dende a CIG pensamos que chegou o momento de dar un paso adiante para que sexa un problema compartido e polo tanto para que ambas partes teñamos interese en solucionalo.

ASEMBLEAS PERSOAL HELP DESK

MÉRCORES E XOVES
DAS 15 ÁS 17 HORAS
NA CAFETERÍA SKIMO

Despedimentos en Orange, xuízo contra Ader e recoñecemento categoría

2009-05-15T03:01:00.000-07:00

Despedimentos en Orange:

Onte RRHH comunicou que debido a unha suposta baixada no volume de chamadas reducirá persoal na campaña, haberá recolocación pero tamén despedimentos.

A Campaña de Orange ten a metade do persoal que tivo en Vigo, non sabemos se esta campaña foi deslocalizada a Bosch-BUA (Arxentina).

Novamente Bosch despide alegando baixada do volume de chamadas, pero non aplica o Convenio porque o persoal despedido é de ETT. O Convenio de Telemárketing non dá cobertura a metade do persoal de Bosch, contratado por ETT.

Lembrade que en caso de despido non debedes asinar ningún finiquito nin documento sen asesorarvos. En moitos casos (como nos despedimentos do verán) os contratos temporais están en fraude de lei, polo que temos dereito a recibir unha indemnización maior da ofertada.

Xuízo contra Bosch e Adder ETT:

Falando de ETT, comentar que o pasado día 12 de maio tivemos un xuízo de reclamación contra Bosch e contra Adder (a peor das ETT que traballan con Bosch). Unha vez máis, unha traballadora foi represaliada por disfrutar da redución de xornada por maternidade.

Estamos a espera de sentenza, pero dende logo e dado que tanto Bosch como Adder non é a primeira vez que teñen este tipo de condutas, estamos valorando darlle unha contestación sindical.

Acordo recoñecemento da categoría de xestor/a:

Nunha empresa da competencia en Vigo a CIG conseguiu, despois de interpoñer demandas xudiciais e celebrar asembleas, un acordo polo que o persoal dun departamento terá a categoría de xestor/a.

Levamos moito tempo demandando de Bosch unha negociación para que se revisen as categorías do persoal de Help-Desk, pero semella tarefa imposible.

Dende esta perspectiva estamos estudando as vías para presentar posibles demandas de categoría co fin de conseguir que o persoal de HD cobre polo traballo especializado e complexo que realiza, xa que non son teleoperadores/as.

En marcha o proceso anual de transformación en indefinidos

2009-03-24T14:41:00.000-07:00

Como xa vos comunicamos instamos á empresa a poñer en marcha o proceso anual de transformación de contratos indefinidos.

A empresa respondeu facilitando unha información ao Comité de Empresa sobre o número de contratos a transformar, que segundo eles serían 55.

Mantemos discrepancias en canto ao número, entre outras cuestións non teñen en consideración os contratos de posta a disposición (feito que deu lugar o ano pasado á presentación dun conflito colectivo estando anunciado recurso ante o Tribunal Supremo). En todo caso dende a CIG fixemos unha proposta nos seguintes termos:

Que se computen para este proceso os contratos de operacións de posta a disposición. Mantendo a discrepancia en canto ao número de contratos.
Que só se inclúan os contratos con mais de 12 meses de antigüidade na empresa, conforme o establecido no Convenio.
Computar 10 puntos repartidos do seguinte xeito: 5 puntos por antigüidade; 1 sobre a formación recibida e 4 sobre a valoración do desempeño.
Propoñemos que os cinco puntos correspondentes á antigüidade se apliquen segundo a seguinte escala: persoal 2005, 5 puntos; persoal 2006, 4 puntos; persoal primeiro semestre 2007, 3 puntos; persoal segundo semestre 2007, 2 puntos; persoal ano 2008 (ata 31/3/2008) 1 punto.
Propoñemos asignar os 4 puntos sobre valoración do desempeño, segundo a seguinte escala: persoal con coachings medios 80-100%, 4 puntos; persoal con coachings medios 70 e 80%, 3 puntos; persoal con coachings medios 60 e 70%, 2 puntos; persoal con coachings medios 50 e 60% 1 punto.
Por último en caso de empate na puntuación, propoñemos que teña en conta as persoas mais antigas na empresa e en caso de persistir o empate as persoas con cargas familiares.

Compañeiras: extremade as precaucións ao saír e entrar do traballo

2009-03-16T08:16:00.000-07:00

Ao longo do último mes temos constancia de varias agresións e intentos de agresións a compañeiras da Avenida de Madrid, tanto á saída como á entrada do centro de traballo. A última foi unha agresión sexual. Non hai que alarmarse, pero si tomar unha medidas mínimas de seguridade.

Ante esta situación puxémonos en contacto coa Subdelegación do Goberno para solicitar un reforzo na vixilancia por parte da Policía Nacional. Ase mesmo entramos en contacto co Concello de Vigo para que a Policía Local tamén extreme a vixilancia.

Tamén somos conscientes da situación, por agora molesta, en María Berdiales, nomeadamente para as compañeiras que entran na quenda das 8 da maña o fin de semana, coincidindo co peche dos locais situados no centro da cidade.

En todo caso son importantes as seguintes recomendacións de autoprotección:

Procurade ir en grupo tanto a saída como a entrada, evitando ir solas.
As compañeiras que vos despracedes dende o centro de Vigo tratade de facelo pola Avenida de Madrid do mesmo lado que as instalacións de Bosch. Evitade a carreteira provincial ou rúas semellantes. Solicitamos que o reforzo policial se concentre na Avenida de Madrid.
Dentro do posible procurade non repetir itinerarios.
Procurade levar o móbil a man, para dar sinal ante calquera problema.
Si vedes calquera movemento sospeitoso (atención ás furgonetas) non dubidedes en chamar á recepción da empresa ou á policía.
Calquera intento de atraco, agresión ou secuestro debe ser denunciado, para contribuír a deter aos culpables evitando a sensación de impunidade e para que as autoridades tomen maior conciencia do problema.

Da empresa agardamos que incremente a presenza dos vixilantes, e que saían a rúa para facer patente a súa presenza. Tamén que teña en conta esta problemática a hora de facer valer a necesidade de chegar puntuais, sobre todo ás primeiras horas da maña e os fines de semana.

Conversión en indefinidos

2009-03-05T11:40:00.001-08:00

O pasado 20 de febreiro dende a Sección Sindical da CIG solicitamos a Bosch que puxera en marcha o proceso de conversión en indefinidos 2009, estando prevista a primeira reunión para este luns 9 de marzo.

O Convenio Colectivo establece que o 30% do persoal de operacións debe ter contrato indefinido. En Bosch-Vigo traballamos 1.414 persoas, 1.256 teñen contrato temporal e só hai 158 indefinidos, unha taxa do 11,17% de indefinidos, cando debería ser dun 30% (424 persoas en total).

Isto é así por que Bosch defende que os contratos de ETT (había 745 a 31 de decembro) non entran neste cómputo, motivo polo que a CIG presentou un Conflito Colectivo na Audiencia Nacional e agora temos presentado recurso ante o Tribunal Supremo.

No Estado Español a destrución de emprego debido a crise, fundamentase na facilidade para rescindir os contratos temporais, lidera o medre do paro, como lideraba e lidera a taxa de temporalidade que é 3 veces superior á europea.

Loitar polo emprego estable é fundamental para facer fronte aos momentos de crise, malia que o persoal fixo tamén está exposto aos despedimentos, ten maiores garantías legais.

Polo de agora a crise aínda non afectou ao sector de telemárketing, pero é preciso afondar na estabilidade no emprego como garantía dos postos de traballo.
Neste senso agardamos que este proceso que se inicia sexa transparente, exerceremos todos os medios ao noso alcance para conseguilo.

Un Convenio baleiro de contidos e que non dá seguridade xurídica aos traballadores e traballadoras

2009-02-12T00:29:00.000-08:00

O pasado día 9 de febreiro tivo lugar unha reunión nacional de delegados e delegadas da CIG nas empresas de telemárketing de toda Galiza para analizar as medidas a tomar ante a situación de inseguridade xurídica creada polo Convenio de Contact Center.

- Salarios: En primeiro lugar e no relativo a falta de actualización de táboas salariais, que deberían ter subido un 2% en xaneiro, aprobamos presentarnos en Conflito Colectivo na Audiencia Nacional.

- Emprego: O Estado español lidera hoxe a destrución de emprego a nivel europeo, debido especialmente a alta taxa de temporalidade. Os despedimentos do persoal fixo teñen unhas garantías maiores que o cese dos contratos temporais.

En Telemárketing a temporalidade supera o 70%, polo que o Convenio provoca unha gran indefensión do persoal nunha situación de crise coma a actual. Os despedimentos están á orde do día, utilizando a crise como escusa.

O Convenio establece un insuficiente 30% do persoal con contrato indefinido e as empresas están utilizando subterfuxios legais para evitar a súa aplicación.

Neste senso, aprobamos facer un seguimento máis escrupuloso que nunca sobre os procesos de transformación en indefinidos que as empresas deben poñer en marcha obrigatoriamente ao longo do primeiro trimestre. Anunciamos tamén que presentaremos conflitos colectivos alá onde o Convenio non se aplique correctamente.

- Reclamacións categoría: A través da CIG estamos canalizando un maior número de reclamación de categorías, nomeadamente da categoría de xestor/a.

Este Convenio, tal como o anterior, creou unha Comisión de clasificación profesional que polo de agora só contribuíu ao mantemento dos liberados de CCOO e UGT.

Nunha situación de crise coma a actual é precisa a paz social, pero esta debe partir dende o respecto ás condicións laborais, da apertura de procesos de negociación a nivel de empresa para suplir os baleiros do I Convenio Estatal de Contact Center. Á espera de que a CIG acade o 51% da representación a nivel galego, preciso para que podamos poñer en marcha o I Convenio Galego dos Centros de Chamadas.

Victoria sindical fronte a Atento: unha dura lección laboral

2009-02-09T00:07:00.000-08:00

Un recente conflito na empresa de telemarketing Atento na Coruña reflicte a importancia de defenderse sindicalmente. O persoal que reclamou xudicialmente contra unha decisión da empresa seguirá traballando, os que optaron por calar quedaron no paro.

Atento presentou en novembro 27 traslados dende a Coruña para un novo centro en León, aberto con subvencións do goberno central. Entre o persoal trasladado figuraban un delegado e unha delegada da CIG.

Con estes traslados Atento pretendía abaratar o despedimento dos traballadores, e traballadoras, consciente de que ninguen deixa a súa vida atras por 700 euros ao mes.

Ante esta situación a CIG chamou ao persoal a mobilizarse e presentar denuncias, así no mes de xaneiro tivo lugar o primeiro xuizo, coñecendose a sentenza o día 6 de febreiro (data na que estaba prevista un novo xuizo).

A sentenza foi favorable para os traballadores e traballadoras, xa que declarou improcedentes os traslados dos dous delegados da CIG, obrigando a repoñelos nas condicións anteriores, é decir a que sigan traballando na Coruña.

Ante a sentenza e para evitar novos xuizos, a empresa negociou co avogado da CIG a recolocación na Coruña do resto do persoal que optou por emprender accións legais contra o traslado.

O persoal que optou anteriormente polo cobro dunha indemnización e marchar da empresa, que non quixo defender legalmente os seus dereitos, quedou no paro. Unha lección para todos e todas.

Canto nos quere quitar a patronal da carteira

2009-01-30T08:44:00.001-08:00

A patronal de telemárketing ACCE, anunciou que non quere aplicar a suba salarial pactada no artigo 45 do Convenio Colectivo de Contact Center , que era o IPC previsto (2%) mais o 0,25%.

A patronal de telemárketing non tivo ningún inconvinte en ligar a suba salarial a este indicador e historicamente sempre o aplicaron sen problema. Este cambio de posición só responde a unha estratexia que busca aprazar a actualización dos nosos salarios utilizando un subterfuxio legal.

Durante a negociación do Convenio dende a CIG defendemos unha suba lineal, rexeitamos asociar os salarios ao IPC, por considerar que é un indicador manipulado que non recolle a suba real do custe da vida. Si se aplicasen as nosas propostas agora non teríamos ningún problema.

Cando coñecemos a decisión da patronal solicitamos a Bosch que actualizara os salarios, algunhas empresas dixeron que si, Bosch novamente e na súa liña dixo que non..

En todo caso pensamos que os sindicatos do sector de telemárketing debemos dar unha resposta conxunta ás empresas coa convocatoria inmediata dunha folga en todo o Estado, para exixir que nos paguen o que é noso.

Importes que as empresas pretenden deixar de pagarnos pola cara:

Coordinadora/nivel 8 327 euros; Xestora/nivel 9 315 euros; Teleoperadora especialista/nivel 10 298 euros; Teleoperadora entrada/nivel 11 285 euros.

Ese diñeiro é noso, xa esta ben utilizar subterfuxios legais para intentar socabar o que é noso.

E por si non queda claro cal é o IPC previsto podedes consultar aquí o aprobado no Consello de Ministros do pasado 9 de xaneiro.

Ampliación do Permiso de Paternidade

2009-01-26T03:04:00.000-08:00

Dende a aprobación da Lei Orgánica 3/2007, do 22 de marzo, para a igualdade efectiva de mulleres e homes, o permiso de paternidade tiña unha duración de 13 días ininterrompidos, ampliábeis en 2 días máis por cada fillo/a a partir do segundo/a, nos casos de parto, adopción ou acollemento múltiple. Esta prestación tramítase no INSS ou no ISM.

Co obxectivo de dar cumprimento ao previsto na disposición transitoria novena la Lei Orgánica 3/2007, do 22 de marzo, para a igualdade efectiva de mulleres e homes, dende o pasado 1 de Xaneiro de 2009, a suspensión do contrato de traballo por paternidade terá unha duración de 20 días, cando o novo nacemento, adopción ou acollemento se produza nunha familia numerosa, cando a familia adquira dita condición co novo nacemento, adopción ou acollemento ou cando na familia haxa unha persoa con discapacidade. A duración indicada ampliarase en dous días máis, é dicir, 22 días, no suposto de parto, adopción ou acollemento múltiple, por cada fillo/a a partir do/a segundo/a, ou se algún deles é unha persoa con discapacidade.

Esta disposición será de aplicación aos nacementos, adopcións ou acollementos que se produzan ou constitúan a partir do 1 de xaneiro de 2009.

En resumo, quen pode disfrutar do permiso de paternidade de 20 días?

Poderán disfrutar do permiso de paternidade de 20 días:

Pais de familias numerosas: as que xa o son e as que adquiran esta condición có novo nacemento ou adopción.
Pais de familias con algún membro con discapacidade.
Pais de familias monoparentais con 2 fillos/as.

A Audiencia Nacional di que hai que cambiar o Convenio de Contact Center

2009-01-14T03:52:00.000-08:00

Como xa anunciamos en anteriores ocasións, presentamos un Conflito Colectivo contra a empresa Bosch Comunication Center ante o que consideramos é unha aplicación interesada do artigo 14 do Convenio, que establece que só o 30% do persoal de operacións debe ter contrato indefinido.

Para calcular ese cómputo, Bosch non tiña en conta os contratos realizados a través de empresas de traballo temporal: de 1.200 persoas traballando na empresa, 600 teñen contratos de ETT.

A Sentenza 136/2008 da Audiencia Nacional desestima a nosa demanda, malia que textualmente di:

“...esta Sala comparte con los demandantes el convencimiento de que la preocupación empresarial por la estabilidad en el empleo del personal de operaciones no se materializa en el modo de calcular el 30% de la plantilla, dada la utilización más que frecuente de contratos de puesta a disposición para ocupar esos puestos”.

“En consecuencia sería necesario otro convenio en el que se limitara el recurso a las ETT, como existen en nuestro ordenamiento jurídico, o bien se redactara el art. 14 de modo que se computaran también los puestos ocupados por trabajadores de puesta a disposición...”.

Solicitabamos tamén que, para o cálculo do 30% do persoal que debe ter contrato indefinido, non se computaran os contratos indefinidos realizados pola empresa dentro da súa liberdade organizativa e sen ter en conta os baremos do Convenio. Inexplicablemente, a Sentenza non entra nesta cuestión.

Ante esta Sentenza presentaremos Recurso no Tribunal Supremo co fin de que se recoñeza o fraude na contratación, que computen os contratos de ETT para o cálculo do 30% de indefinidos, e para que se dea contestación ao resto de cuestións formuladas na demanda.

Agardamos que se imparta xustiza, impedindo que Bosch teña 600 persoas de ETT para abaratar, aínda máis, as precarias condicións laborais do Convenio de Contact Center e para minorar os escasos compromisos en materia de estabilidade que recolle este mal convenio.

Indefinidos: Xuízo na Audiencia Nacional o día 11 de decembro

2008-12-09T13:28:00.000-08:00

Tras meses de espera o vindeiro día 11 de decembro terá lugar na Audiencia Nacional a vista pola demanda que presentamos contra Bosch polo proceso de conversión en indefinidos realizado neste ano 2008.

A principios de ano había 72 persoas fixas sobre un cadro de persoal de 1.200. Dende a CIG instamos a empresa a levar adiante o proceso de transformación en indefinidos, un proceso que ao noso entender foi incompleto, pero que elevou o número de indefinidos a 150.

Cabe lembrar que o Convenio establece que só un 30% do persoal de operacións debe ter contrato indefinido, debendo realizarse no primeiro trimestre de cada ano unha transformación de contratos a indefinidos ata acadar esta porcentaxe.

Para este calculo Bosch non incluíu o numeroso persoal contratado a través de Empresas de Traballo Temporal, minorando deste xeito o número de persoas que deberían ter contrato indefinido.

Tampouco facilitou a información requirida para que puideramos facer os cálculos dos días cotizados. Pretendían que aceptásemos os seus cálculos a cegas.

Por último os criterios que se utilizaron para a transformación tampouco foron os establecidos no Convenio, polo que ante todo o exposto optamos por presentar Conflito Colectivo.

Informarémosvos puntualmente do que suceda no xuízo a espera dunha sentenza que agardamos nos dea a razón, e que obrigue a empresa a transformar novos contratos en indefinidos en Bosch-Vigo.

Contestación da AEPD: Bosch non pode expoñer os “coachings”

2008-12-05T02:43:00.000-08:00

Tal e como anunciamos anteriormente, fixemos unha consulta á Axencia Estatal de Protección de Datos (AEPD), relativa a exposición dos “coachings” por parte de Bosch.

Lembrar que en CAC_REC os “coachings” están colgados nas paredes, figurando en distintas cores segundo os tempos de chamada.

Na súa contestación, a Axencia Estatal de Protección de Datos considera que esta exposición pode implicar un tratamento de datos conforme ao establecido na Lei Orgánica 15/1999 de Protección de Datos de Carácter Persoal. Polo tanto a exposición debe contar co consentimento expreso dos traballadores/as e cabe o dereito a oposición.

Así, calquera persoa pode solicitar por escrito á empresa que non se expoñan os seus datos persoais, axuntando copia do DNI xunto co escrito, quedando con acuse de recibo.

Se no prazo dun mes non recibe contestación, ou esta non é satisfactoria, pode presentar reclamación ante a Axencia Estatal de Protección de Datos.

Ante esta situación (malia que a petición é individual, xa que segundo a AEPD o dereito é “persoalísimo”), solicitaremos de Bosch que retire os “coachings” expostos nos centros de traballo, xa que non conta co consentimento expreso do persoal, pode vulnerar a lexislación vixente e, polo tanto, ser motivo de sanción á empresa.

Se queres exercer o teu dereito, non dubides en poñerte en contacto con calquera delegada/o da CIG que te asesoraremos en todo momento.

Por un novo modelo económico e social, a crise que a pague o capital

2008-11-12T09:44:00.000-08:00

Ao longo dos últimos anos os traballadores e traballadoras sufrimos as consecuencias da especulación instalada na economía, que se traduciu nunha desmedida alza do prezo da vivenda e dos produtos de consumo e dos servizos. Sufrimos tamén a implantación dun modelo laboral baseado na precarización das condicións laborais coa extensión das xornadas laborais; o incremento brutal das cargas de traballo; pola subcontratación e por unhas altas taxas de temporalidade. Os traballadores e traballadoras sufrimos a peor parte nos tempos de bonanza.

Agora a especulación levou ao sistema a unha crise sen precedentes que ameaza cada día a un maior número de postos de traballo, pola vía dos Expedientes de Regulación de Emprego, pero tamén pola rescisión dos contratos temporais. Tamén estamos ante un constante empeoramento das condicións laborais.

O Goberno está poñendo en marcha medidas económicas illadas que fundamentalmente consisten en inxentes axudas (sen ningún tipo de control democrático) ás Entidades Financeiras (responsables en gran medida da crise) e ao resto das empresas.

Neste senso, dende a Confederación Intersindical Galega demandamos un paquete de medidas económicas, sociais e laborais fronte á crise, para que non sexamos de novo os traballadores e as traballadoras quen paguemos a peor parte.

Cando os despedimentos están na axenda da maior parte das empresas, cando estas tratan de reducir custes empeorando as condicións laborais, os sindicatos non podemos ser testemuñas mudas ante esta situación. É preciso mobilizarse a prol dun novo modelo máis xusto e sustentable socialmente.

Dende esa perspectiva, o vindeiro día 13 de novembro a CIG ten convocadas manifestacións en todo o país, para reivindicar un novo modelo no que economía estea ao servizo das persoas.

O vindeiro 13 de novembro participa nas manifestacións convocadas pola CIG:

A Mariña: Saída ás 19:30 da Praza Maior de Viveiro.
A Coruña: Saída ás 20:00 horas da Praza da Palloza.
Ferrol: Saída ás 19:30 da Avenida de Esteiro, diante do sindicato.
Lugo: Saída ás 20:00 da Ronda da Muralla, diante do sindicato.
Ourense: Saída, ás 20:00 do Pavillón dos Remedios.
Pontevedra: Saída ás 20:30 da Praza da Ferrería.
Santiago: Saída ás 20:00 da Praza Roxa.
Vigo: Saída ás 20:00 da Vía Norte.

O acordo horario de CAC_REC non é de eficacia xeral

2008-11-11T06:28:00.000-08:00

O “Acordo de Disponibilidade Horaria” foi rexeitado pola maioría do anterior Comité de Empresa e pola actual, é un pacto de eficacia limitada que obriga a delegadas, candidatas e afiliadas a CCOO.

Tal e como denunciamos anteriormente está por baixo do Convenio Colectivo: nin a empresa demostrou a necesidade de libertinaxe horario en CAC_REC, nin se cumpren os dias de preaviso ante o cambio de horario. Son 12 cambios horarios mensuais a cambio dunha miserable compensación económica non consolidada.

Agora ben, si non optamos pola súa impugnación foi por que só obriga as delegadas e afiliadas doutro sindicato. Nese senso ala cada quen.

Quede claro que legalmente si non hai voluntarias legalmente o acordo debe aplicarselle a afiliación de CCOO.

Pero si ante a falta de voluntarios a empresa persiste en presionar ao persoal de CAC_REC para que acepte un acordo non subscrito pola maioría da representación sindical tomaremos as medidas legais e sindicais ao noso alcance para que sexa declarado nulo.